گرین ای ٹیکسی اسکیم سے فائدہ کیسے اٹھائیں؟

پنجاب حکومت کا گرین ای ٹیکسی پلان 2025 نوجوانوں کے لیے روزگار کے مواقع پیدا کر سکتا ہے اس سکیم میں کیسے درخواست دیں اس بارے آپ کو آگاہ کرتے ہیں۔

ملک میں بڑھتی ہوئی بے روزگاری اور مہنگائی کے اس دور میں جب ہر نوجوان ایک بہتر مستقبل کی تلاش میں ہے، حکومت کی جانب سے ایک نئی امید کی کرن سامنے آئی ہے،  گرین ای ٹیکسی اسکیم،  یہ اسکیم نہ صرف بیروزگار نوجوانوں کو باعزت روزگار فراہم کرنے کا ذریعہ بنے گی، بلکہ ماحولیاتی تحفظ کے عزم کو بھی آگے بڑھائے گی۔

 پنجاب حکومت کے گرین ای ٹیکسی پلان 2025 میں اہل افراد کو آسان اقساط پر الیکٹرک اور ہائبرڈ ٹیکسیاں فراہم کی جائیں گی۔ منصوبہ نوجوانوں کو روزگار کے مواقع فراہم کرے گا۔

 سرکاری حکام کے مطابق منصوبے کے پہلے مرحلے میں 11 سو ای ٹیکسیاں آسان اور بغیر سود اقساط کے فراہم کی جائیں گی، 30 فیصد کوٹہ خواتین کیلئے رکھا گیا ہے۔

یہ بھی پڑھیں : مہنگائی سے ستائی عوام کیلئے بُری خبر، پٹرولیم مصنوعات کی قیمتیں بڑھنے کا امکان

سکیم میں ہونیری وی سی 20 اور سی سی 30 ماڈلز کی الیکٹرک ٹیکسیاں دی جائیں گی، جن کی بیٹری 200 سے 300 کلومیٹر رینج تک فی جارچ ہوں گی اور لاہور میں ہر 5 سے 7 کلومیٹر تک چارجنگ سٹیشنز قائم کیے جائیں گے۔

اس منصوبے میں صوبائی حکومت 65 لاکھ روپے کا بغیر سود قرض دے گی جبکہ گاڑی حاصل کرنے کیلئے 18 سے 20 لاکھ روپے تک کی ڈاؤن پیمنٹ دینا ہو گی، جبکہ قرض کی ماہانہ قسط 55 سے60 ہزار روپے ہو گی، حکومت کی طرف سے عوام کیلئے مزید معاونت بھی زیرغور ہے۔

پنجاب حکومت کی اس سکیم میں شامل ہونے کے لیے درخواست گزار کا پاکستانی اور ڈومیسائل پنجاب کا ہونا لازم ہو گا، درخواست گزار کی عمر 21 سے 45 سال کے درمیان ہو، جبکہ کمپیوٹرائزڈ قومی شناختی کارڈ اور ڈرائیونگ لائسنس بھی بنا ہوا ہو جس کی معیاد ختم نہ ہوئی ہو۔ پاسپورٹ سائز فوٹو، ایڈریس کی تصدیق کیلئے ڈومیسائل یا یوٹیلیٹی بل اور بینک اکاؤنٹ کی تفصیلات جمع کرانا ہوں گی۔

اس سکیم کو کم آمدنی والے افراد کیلئے رکھا گیا ہے اور زیادہ آمدنی والے یا مجرمانہ ریکارڈ رکھنے والے افراد اس سکیم میں درخواست دینے کے اہل نہیں ہوں گےجبکہ ایک سے زیادہ گاڑیوں کے خواہشمند افراد کو این ٹی این یا کاروباری معلومات فراہم کرنا ہوں گی۔

اس سکیم کیلئے اپلائی آن لائن ہی کیا جائے گا، جس کی رجسٹریشن سرکاری پورٹل پر قومی شناختی کارڈ اور فون نمبر کے ذریعے ہو گی، ون ٹائم پاسپورڈ کے ذریعے رجسٹریشن کی تصدیق ہو گی۔

یہ بھی پڑھیں: پنجاب حکومت کا بڑا اقدام ،مفت ای بائیک سکیم کا اعلان، جا نئے اہلیت اور درخواست دینے کی آخری تاریخ بارے

درخواست دینے کے بعد کامیاب امیدوار بینک کے عمل کو مکمل کرے گا اور پھر ٹیکسی کی حوالگی کا شیڈول حاصل کرے گا۔

ماحول دوست الیکٹرک گاڑیوں کے ذریعے روزگار کے مواقع فراہم کرنا، ایک انقلابی قدم ہے جس سے نہ صرف افراد بلکہ پورا معاشرہ فائدہ اٹھا سکتا ہے۔