وزیراعظم شہباز شریف کی سعودی ولی عہد سے ملاقات، دوطرفہ تعلقات اور اہم امور پر تبادلہ خیال

وزیراعظم شہباز شریف نے سعودی ولی عہد محمد بن سلمان سے ملاقات کی جس میں دوطرفہ تعلقات اور دیگر اہم امور پر تبادلہ خیال کیا گیا۔ ملاقات میں فیلڈ مارشل سید عاصم منیر، وزیرِ دفاع خواجہ آصف، وزیرِ خارجہ اسحاق ڈار اور وزیرِ خزانہ محمد اورنگزیب بھی شریک تھے۔

سعودی شاہی محل آمد پر وزیراعظم شہباز شریف کا پرتپاک استقبال کیا گیا اور انہیں گارڈ آف آنر بھی پیش کیا گیا۔

اس سے قبل سعودی عرب پہنچنے پر وزیراعظم شہباز شریف کے طیارے کو سعودی فضائیہ کے ایف-15 لڑاکا طیاروں نے اپنی حفاظت میں لیا اور ایئر بیس تک مکمل پروٹوکول دیا۔ بعد ازاں رائل ٹرمینل پر ڈپٹی گورنر ریاض شہزادہ محمد بن عبدالرحمن بن عبدالعزیز نے ان کا استقبال کیا۔

یہ بھی پڑھیں: شاہی استقبال: سعودی جنگی طیاروں نے وزیرِاعظم شہباز شریف کے طیارے کو سعودی فضائی حدود میں داخلے ہوتے ہی حصار میں لے لیا

وزیراعظم اور ڈپٹی گورنر ریاض کے درمیان ملاقات بھی ہوئی، جس میں پاک سعودی تعلقات اور دوطرفہ تعاون پر بات چیت کی گئی۔

واضح رہے کہ وزیراعظم شہباز شریف سعودی ولی عہد شہزادہ محمد بن سلمان کی دعوت پر سعودی عرب کے دورے پر گئے ہیں۔