پنجاب کے مختلف علاقوں میں بدھ اور جمعرات کی درمیانی شب زلزلے کے جھٹکے محسوس کیے گئے، جڑانوالہ کے قریب 3.8 شدت کا زلزلہ آیا۔
پاکستان محکمہ موسمیات (پی ایم ڈی) کے مطابق زلزلہ رات 11 بج کر 56 منٹ پرآیا، جس کا مرکز جڑانوالہ کے جنوب میں 16 کلومیٹر کے فاصلے پر تھا اوراس کی گہرائی 40 کلومیٹر تھی۔
زلزلے کے جھٹکوں کے بعد شہری گھروں سے باہر نکل آئے اور خوف و ہراس پھیل گیا، تاہم فوری طور پر کسی جانی یا مالی نقصان کی اطلاع موصول نہیں ہوئی۔ یہ زلزلہ ایک ہفتے کے دوران پنجاب میں آنے والا دوسرا جبکہ رواں ماہ کا تیسرا زلزلہ تھا۔
صوبائی ڈیزاسٹر مینجمنٹ اتھارٹی کے ترجمان نے بتایا کہ ’اس سے قبل ہفتے کے آغاز میں بھی پنجاب کے مختلف علاقوں، جن میں ملتان بھی شامل ہے، میں زلزلے کے جھٹکے محسوس کیے گئے تھے۔ اس زلزلے کی شدت 4.8 ریکارڈ کی گئی تھی، جس کا مرکز ملتان سے 126 کلومیٹر مغرب میں تھا اور گہرائی 55 کلومیٹر تھی‘۔
ڈی جی پی ڈی ایم اے کے مطابق زلزلے کے بعد صوبے بھر میں انتظامی ٹیموں نے عمارتوں کا معائنہ کیا۔ انہوں نے بتایا کہ پی ڈی ایم اے کا صوبائی کنٹرول روم اور تمام ضلعی ایمرجنسی آپریشن سینٹرز 24 گھنٹے الرٹ پر ہیں۔
ماہ ستمبر میں یہ تیسرا زلزلہ ہے، اس سے پہلے پہلا زلزلہ 4 ستمبر کو ریکارڈ کیا گیا تھا۔ حکام نے شہریوں سے اپیل کی ہے کہ وہ ممکنہ آفٹر شاکس یا مستقبل میں آنے والے زلزلوں کے پیش نظر احتیاطی تدابیر اختیار کریں اور حفاظتی ہدایات پر عمل کریں۔
By 
