سعودی عرب میں 23 ستمبر قومی دن کے طور پر جوش و جذبے سے منایا جاتا ہے، اس روز ملک بھر میں مختلف تقریبات کا اہتمام کیا جاتا ہے۔
یہ دن مملکت کی بنیاد 1932 میں عبد العزیز بن عبد الرحمن آل سعود کے ذریعے رکھی جانے کی یاد میں منایا جاتا ہے۔ دارالحکومت ریاض سمیت مملکت کے تمام چھوٹے بڑے شہروں کی شاہراہوں اور اندرون شہر گلیوں، بازاروں کو قومی پرچموں سے سجا دیا گیا ہے اور پوری مملکت سبز روشنیوں سے جگمگا رہی ہے۔
سعودی عرب کے 95ویں یومِ الوطنی کے موقع پر ریاض، جدہ، دمام اور دیگر شہروں میں تقریبات کا سلسلہ جاری ہے۔ سعودی شہری گاڑیوں اور گھروں پر قومی پرچم لہرا رہے ہیں، ریاض میں جاری فوجی پریڈنےقومی دن کی تقریب کوچارچاند لگا دیے۔
ریاض میں منعقدہ مرکزی تقریب میں شاندارآتش بازی کا مظاہرہ کیا گیا، ثقافتی شو، فوجی پریڈ اور روایتی رقص نے جشن کو چار چاند لگا دیے، سعودی قیادت کی جانب سے قوم کو مبارکباد کے پیغامات بھیجے گئے ہیں۔
سعودی عرب کے قومی دن کے موقع پر آج ملک بھر میں عام تعطیل بھی ہے اور عوام الناس جوش وخروش سے یوم الوطنی منانے کے لیے سڑکوں پر ہیں، عوام کی تفریح کے لیے بھی متعدد اقدامات کیے گئے ہیں۔
دریں اثنا سعودی عرب کے 95 ویں یوم الوطنی پر عالمی رہنماؤں کی جانب سے خادم حرمین شریفین اور سعودی قیادت کو مبارک باد کے پیغامات بھجوائے گئے ہیں۔
بحرین، اردن، قطر، عمان، کویت کے سربراہان مملکت کی جانب سے تہنیتی پیغامات میں شاہ سلمان بن عبدالعزیز کی اچھی صحت، خوشی، درازی عمر، سعودی عوام کی مسلسل ترقی اور خوشحالی کےلیے نیک خواہشات کا اظہار کیا۔
By 
