وزیراعظم شہباز شریف کے دورۂ سعودی عرب کا اعلان

سعودی ولی عہد اور وزیر اعظم محمد بن سلمان کی خصوصی دعوت پر وزیراعظم پاکستان میاں شہباز شریف27 سے 29 اکتوبر 2025 کو 3 روزہ سرکاری دورے پر سعودی عرب جائیں گے، جہاں وہ ریاض میں فیوچرانویسٹمنٹ انیشی ایٹو میں بھی شرکت کریں گے۔

دفتر خارجہ کی جانب سے جاری اعلامیے کے مطابق وزیراعظم پاکستان میاں شہباز شریف ایک اعلیٰ سطح کے وفد کی قیادت کریں گے، جس میں نائب وزیراعظم اور وزیر خارجہ سینیٹر محمد اسحق ڈار اور سینیئر کابینہ کے ارکان شامل ہیں، تاکہ نویں فیوچر انویسٹمنٹ انیشی ایٹو میں شرکت کی جا سکے جو ریاض میں منعقد ہو رہی ہے۔

یہ بھی پڑھیں:وزیرِ اعظم شہباز شریف کا دورہ سعودی عرب، سعودی ولی عہد محمد بن سلمان کا شہباز شریف کے اعزاز میں ظہرانہ

 فیوچر انویسٹمنٹ انیشی ایٹو جس کا موضوع ‘خوشحالی کی کلید: ترقی کے نئے افق کو کھولنا‘ ہے، عالمی رہنماؤں، سرمایہ کاروں، پالیسی سازوں کو ایک ساتھ لائے گا تاکہ عالمی اقتصادی چیلنجز اور مواقع پر تبادلہ خیال کیا جا سکے۔ مباحثے میں جدت، پائیداری، اقتصادی شمولیت اور ابھرتے ہوئے جیوپولیٹیکل ڈائنامکس پر توجہ دی جائے گی۔

دورے کے دوران، وزیر اعظم شہباز شریف سعودی قیادت سے ملاقات کریں گے تاکہ تجارت، سرمایہ کاری، توانائی اور انسانی وسائل کے شعبوں میں تعاون کے نئے راستے تلاش کیے جا سکیں۔ دونوں جانب علاقائی اور بین الاقوامی مسائل پر بھی تبادلہ خیال کیا جائے گا۔

کانفرنس کے ضمنی اجلاسوں میں، وزیر اعظم دیگر شریک ممالک کے رہنماؤں اور بین الاقوامی اداروں کے سربراہان سے ملاقات کریں گے تاکہ پاکستان کی سرمایہ کاری کی صلاحیت اور پائیدار ترقی کے عزم کو اجاگر کیا جا سکے۔

مزید پڑھیں:وزیراعظم شہباز شریف کا دورۂ امریکہ ، اقوام متحدہ کی جنرل اسمبلی میں اہم ملاقاتیں متوقع

یہ دورہ پاکستان کی اقتصادی سفارت کاری کو فروغ دینے اور سرمایہ کاری، ٹیکنالوجی اور پائیداری میں اسٹریٹجک شراکت داری مضبوط کرنے کے عزم کو اجاگر کرتا ہے، جو حکومت کے عالمی تعاون کے ذریعے ترقی کے وژن کی عکاسی کرتا ہے۔