آئندہ سال فریضۂ حج ادا کرنے کے خواہشمند افراد کے اہم خبر

آئندہ سال سرکاری حج اسکیم کے تحت فریضۂ حج ادا کرنے والے عازمین کے لیے ایک اہم اطلاع سامنے آئی ہے۔ وزارتِ مذہبی امور نے واضح کر دیا ہے کہ حج واجبات کی دوسری قسط جمع کرانے کی مقررہ آخری تاریخ کل ہے، اور تمام عازمین کو ہدایت کی گئی ہے کہ وہ اس مدت کے اندر اپنی ادائیگی لازمی مکمل کریں۔

تفصیلات کے مطابق، وزارتِ مذہبی امور کے ترجمان نے بتایا کہ سرکاری حج اسکیم کے تحت منتخب ہونے والے تمام عازمین کے لیے حج واجبات کی دوسری قسط جمع کرانے کا کل آخری دن ہے۔

ترجمان نے کہا کہ مقررہ وقت میں ادائیگی یقینی بنانے کے لیے نامزد بینکوں کو خصوصی اقدامات کی ہدایات جاری کی گئی ہیں۔ اسی سلسلے میں تمام متعلقہ بینک کل خصوصی طور پر کھلے رہیں گے تاکہ عازمین کو اپنی قسط جمع کرانے میں کسی قسم کی دشواری کا سامنا نہ کرنا پڑے۔

ترجمان نے مزید واضح کیا کہ وزارت کی جانب سے عازمین کو یہ بھی ہدایت جاری کی گئی ہے کہ وہ اپنی دوسری قسط ہر صورت کل تک جمع کرا دیں۔ اگر کوئی درخواست گزار مقررہ وقت کے اندر واجبات جمع نہیں کراتا تو اس کی حج درخواست منسوخ بھی ہو سکتی ہے۔

یہ بھی پڑھیں: سرکاری حج سکیم کے تحت واجبات کی آخری قسط کی وصولی کا آغاز

اس لیے تمام عازمین کو تاکید کی گئی ہے کہ ادائیگی کے بعد اپنی کمپیوٹرائزڈ بینک رسید لازمی حاصل کریں، کیونکہ یہ رسید آئندہ مراحل میں کسی بھی قسم کی تصدیق یا کاروائی کے لیے ضروری ثابت ہو سکتی ہے۔

وزارت کے ترجمان کا یہ بھی کہنا تھا کہ تمام نامزد بینکوں کو باضابطہ طور پر ہدایات جاری کر دی گئی ہیں تا کہ حج واجبات کی وصولی کے عمل کے دوران کسی بھی حاجی کو مشکلات یا غیر ضروری تاخیر کا سامنا نہ کرنا پڑے۔

وزارتِ مذہبی امور نے ایک مرتبہ پھر عازمین سے درخواست کی ہے کہ وہ مقررہ وقت کی پابندی کرتے ہوئے اپنی دوسری قسط جمع کرائیں اور تمام ضروری دستاویزات کی تسلی کر لیں تاکہ حج کے مراحل بروقت اور بلا تعطل مکمل کیے جا سکیں۔