دبئی ایئر شو میں بھارتی طیارہ گرنے پر بالی ووڈ فنکاروں کی بھی مودی سرکار پر شدید تنقید

دبئی ایئر شو کے دوران بھارتی فضائیہ کا لڑاکا طیارہ تیجس گر کر تباہ ہوگیا، جس کے نتیجے میں پائلٹ جاں بحق ہوگیا۔ اس حادثے کے بعد بالی ووڈ کے متعدد معروف فنکاروں نے حکومت کو شدید تنقید کا نشانہ بنایا اور مطالبہ کیا کہ واقعے کی شفاف اور بروقت تحقیقات کی جائیں۔

اداکارہ پریانکا چوپڑا نے حادثے پر گہرے دکھ کا اظہار کرتے ہوئے کہا کہ پائلٹ کے اہلِ خانہ کو مکمل معلومات فراہم کی جائیں اور ایسے واقعات کی روک تھام کے لیے حفاظتی اقدامات کو مزید مؤثر بنایا جائے۔

جیہ بچن نے بھی زور دیا کہ فضائیہ کے عملے کے لیے محفوظ ماحول اور سخت حفاظتی پروٹوکول یقینی بنانا ضروری ہے۔

شتروگھن سنہا نے حکومت سے مطالبہ کیا کہ فضائی مشقوں کے دوران حفاظتی معیار اور ٹیسٹنگ کے عمل کو مزید مضبوط کیا جائے تاکہ مستقبل میں اس نوعیت کے سانحات سے بچا جا سکے۔

یہ بھی پڑھیں: بھارت نے دبئی ایئر شو میں ’تیجس طیارے‘ کی تباہی کا ذمہ دار امریکا کو ٹھہرا دیا

اداکار اکشے کمار نے پائلٹ اور اس کے اہلِ خانہ سے ہمدردی کا اظہار کرتے ہوئے قوم سے کہا کہ وہ اس قربانی کو یاد رکھے۔ رتھک روشن نے اس حادثے کو نہ صرف بھارتی فضائیہ بلکہ پوری قوم کے لیے ایک المیہ قرار دیا، جبکہ اداکار رجنی کانت نے پائلٹ کی خدمات کو خراجِ تحسین پیش کیا اور افسوس کا اظہار کیا۔

ماہرین کے مطابق اس حادثے نے ایئر شو کے سیکیورٹی پروٹوکولز پر سوالات اٹھا دیے ہیں اور فضائی مشقوں کے دوران حفاظتی معیار بہتر بنانے کی ضرورت کو نمایاں کر دیا ہے۔

یاد رہے کہ دبئی ایئر شو کے دوران بھارتی فضائیہ کا لڑاکا طیارہ تیجس کرتب پیش کرتے ہوئے گر کر تباہ ہوگیا، جس کے نتیجے میں پائلٹ موقع پر ہی جاں بحق ہوگیا۔ یاد رہے کہ گزشتہ روز ایئر شو کے ایروبیٹک سیشن کے دوران یہ حادثہ پیش آیا تھا، جس کے فوراً بعد ایئر شو کی سرگرمیوں کو عارضی طور پر روک دیا گیا اور ریسکیو ٹیموں نے موقع پر پہنچ کر آگ پر قابو پایا۔ واقعے کے بعد دبئی حکام اور بھارتی فضائیہ نے مشترکہ طور پر ابتدائی تحقیقاتی عمل شروع کر دیا ہے۔