برصغیر کے ممتاز اور عہد ساز اداکار دھرمیندر کے انتقال کی خبر سامنے آتے ہی بھارتی فلم نگری پر افسردگی کی فضا طاری ہوگئی۔ 24 نومبر 2025کو ممبئی سے یہ المناک اطلاع موصول ہوئی کہ 89 برس کی عمر میں دھرمیندر طویل علالت کے بعد دنیا سے رخصت ہو گئے۔ ان کے انتقال نے نہ صرف فلمی حلقوں بلکہ مداحوں کے دلوں میں بھی غم اور دکھ کی گہری لہر دوڑادی ہے۔ ساتھی فنکاروں، ہدایت کاروں اور اہلِ خانہ نے اس موقع پر اپنی دلی تعزیت اور افسوس کا اظہار کیا۔
پنجاب کے ایک چھوٹے سے گاؤں میں پیدا ہونے والے دھرمیندر نے سادگی اور دیہی ماحول میں آنکھ کھولی، لیکن اپنی محنت، لگن اور غیر معمولی فنکارانہ صلاحیتوں کے ذریعے فلمی دنیا میں وہ مقام حاصل کیا جو بہت کم فنکاروں کے حصے میں آتا ہے۔ اپنی پہلی ہی فلم سے شہرت پانے والے دھرمیندر نے چھ دہائیوں پر مشتمل کیریئر میں رومانی ہیرو سے لے کر ایکشن کرداروں تک ہر شعبے میں اپنی صلاحیتوں کا لوہا منوایا۔ ان کی شہرہ آفاق فلم شعلے آج بھی بھارتی سینما کی تاریخ میں سنگِ میل کی حیثیت رکھتی ہے، جس میں ان کی کردار نگاری کو بے پناہ سراہا جاتا ہے۔
دھرمیندر کی نجی زندگی بھی ہمیشہ توجہ کا مرکز رہی۔ انہوں نے پہلے پرکاش کور اور بعد ازاں ہیما مالنی سے شادی کی ۔ ان کے بیٹے سنی دیول اور بوبی دیول سمیت بیٹی ایشا دیول نے بھی فلمی دنیا میں نمایاں مقام حاصل کیا۔
فلمی خدمات کے اعتراف میں دھرمیندر کو متعدد قومی اور فلمی اعزازات سے نوازا گیا۔ ان کی شخصیت کی سادگی، ملنساری اور شرافت نے انہیں نہ صرف ایک عظیم فنکار بلکہ ایک قابلِ احترام انسان بھی بنا دیا۔
ان کے انتقال پر فلمی دنیا بھرپور انداز میں سوگوار دکھائی دی۔ راجنی کانت، چرن جیوی، کمل ہاسن، پریانکا چوپڑا، کاجول، شِلپا شیٹی، امتابھ بچن، شاہ رخ خان، عامر خان، سلمان خان اور اکشے کمار سمیت متعدد نامور فنکاروں نے افسوس کا اظہار کرتے ہوئے دھرمیندر کو بھارتی سینما کا روشن ستارہ قرار دیا۔ مختلف فنکار اہلِ خانہ سے اظہارِ تعزیت کے لیے ان کی رہائش گاہ بھی پہنچے اور ان کے فن اور خدمات کو عقیدت کے ساتھ یاد کیا۔
فلمی حلقوں کا کہنا ہے کہ دھرمیندر کی رحلت سے بھارتی سینما کا ایک درخشاں باب اختتام پذیر ہوگیا ہے، اور ان کا خلا کبھی پُر نہیں ہوسکے گا۔ دھرمیندر کی فنکارانہ میراث، شرافت اور محبت ہمیشہ اُن کی یادوں کو زندہ رکھے گی۔
By 
