جرمنی میں ملازمت کے خواہشمند پاکستانیوں کے لیے بڑی خوشخبری سامنے آئی ہے، کیونکہ اب پاکستانی شہری بغیر کسی پہلے سے موجود جاب آفر کے جرمنی جا کر ایک سال تک ملازمت تلاش کر سکیں گے۔
جرمن حکومت نے پاکستان کے ہنر مند افراد کے لیے ایک نیا موقع فراہم کیا ہے جسے “Opportunity Card” کا نام دیا گیا ہے۔ اس اسکیم کا مقصد عالمی سطح پر ہنر مند پیشہ ور افراد کو جرمنی کی لیبر مارکیٹ کی جانب راغب کرنا ہے، جبکہ پاکستانی شہری اس اقدام سے بھرپور فائدہ اٹھا سکیں گے۔
تفصیلات کے مطابق “Opportunity Card” رکھنے والے پاکستانی افراد کو ایک سال تک جرمنی میں قیام کی اجازت ملے گی۔ اس دوران وہ نہ صرف فل ٹائم یا پارٹ ٹائم ملازمت کر سکیں گے بلکہ ہفتے میں 20 گھنٹے تک ضمنی کام (Side Job) بھی کر سکتے ہیں۔ مزید یہ کہ امیدواروں کو دو ہفتے تک ممکنہ آجر کے ساتھ جاب ٹرائل میں حصہ لینے کی سہولت بھی حاصل ہوگی، جس سے انہیں ملازمت کے امکانات جانچنے اور بہتر مواقع تلاش کرنے میں مدد ملے گی۔
خواہشمند افراد کے لیے درخواست کا طریقہ کار بھی انتہائی آسان رکھا گیا ہے۔ درخواست مکمل طور پر آن لائن جرمنی کے فیڈرل فارن آفس کے پورٹل کے ذریعے جمع کرائی جا سکتی ہے۔ اس اسکیم کے تحت درخواست دہندگان کو کم از کم 6 پوائنٹس حاصل کرنا ضروری ہیں، جو تعلیمی قابلیت، پیشہ ورانہ ہنر، تجربہ، زبان دانی، عمر اور جرمنی میں سابقہ قیام جیسے عوامل کی بنیاد پر دیے جاتے ہیں۔
مالی ضروریات کے اعتبار سے درخواست دہندگان کو یہ ثابت کرنا ہوگا کہ وہ جرمنی میں قیام کے دوران اپنے اخراجات برداشت کرنے کی اہلیت رکھتے ہیں، جس کے لیے کم از کم €1,091 ماہانہ رقم دکھانی ہوگی۔ یہ شرط اس بات کو یقینی بنانے کے لیے رکھی گئی ہے کہ امیدوار جرمنی میں قیام کے دوران کسی مالی مشکل کا شکار نہ ہوں۔
جرمن حکومت کا یہ قدم ہنر مند افراد کو عالمی سطح پر راغب کرنے کی پالیسی کا حصہ ہے، جس سے پاکستانی پیشہ ور افراد کے لیے یورپ میں روزگار کے نئے دروازے کھل گئے ہیں۔ یہ اسکیم نہ صرف بیرون ملک کیریئر بنانے کے خواہشمند پاکستانیوں کے لیے اہم پیش رفت ہے بلکہ جرمن لیبر مارکیٹ میں افرادی قوت کی کمی کو پورا کرنے میں بھی معاون ثابت ہوگی۔
