این ڈی ایم اے کی بارش اور برفباری کی پیشگوئی، ایڈوائزری جاری

 نیشنل ڈیزاسٹر مینجمنٹ اتھارٹی (این ڈی ایم اے) نے ملک کے بالائی علاقوں میں 13 سے 18 دسمبر کے دوران بارش اور برفباری کی پیشگوئی کرتے ہوئے احتیاطی تدابیر اختیار کرنے کی ایڈوائزری جاری کر دی ہے۔

یہ بھی پڑھیں:سردی کی شدت میں اضافے سے متعلق محکمہ موسمیات کی اہم پیشگوئی

این ڈی ایم اے کے نیشنل ایمرجنسی آپریشنز سینٹر (این ای او سی) کے مطابق بالائی خیبر پختونخوا، کوہستان، گلگت بلتستان، آزاد جموں کشمیر اور بلوچستان کے بعض حصوں میں بارش اور برفباری متوقع ہے۔ 13 سے 15 دسمبر کے دوران مغربی ہواؤں کا ایک سلسلہ ملک کے شمالی اور مغربی علاقوں کو متاثر کر سکتا ہے۔

ایڈوائزری میں کہا گیا ہے کہ متوقع موسمی صورتحال کے باعث میدانی علاقوں میں ہلکی سے درمیانی بارش جبکہ بالائی اور پہاڑی علاقوں میں برفباری ہو سکتی ہے، جبکہ بعض مقامات پر شدید دھند کا بھی امکان ہے۔ کوہستان، بالائی خیبر پختونخوا، گلگت بلتستان کے بلند علاقوں اور آزاد کشمیر کے پہاڑی خطوں میں شدید برفباری کی پیشگوئی کی گئی ہے۔

این ڈی ایم اے نے خبردار کیا ہے کہ شدید برفباری کے باعث پہاڑی علاقوں میں سڑکوں پر ٹریفک متاثر ہو سکتی ہے اور بعض مقامات پر راستے بند ہونے کا خدشہ ہے۔ کوئٹہ، زیارت اور شمال مغربی بلوچستان کے بعض حصوں میں ہلکی بارش جبکہ ملحقہ پہاڑی علاقوں میں برفباری متوقع ہے۔

مزید پڑھیں:ملک کے کون سے بڑے شہردھند اور شدید سردی کی لپیٹ میں رہیں گے؟، محکمہ موسمیات نے تازہ پیشگوئی کردی

16 سے 18 دسمبر کے دوران برفباری کی شدت میں کمی آنے کا امکان ہے تاہم سرد موسم برقرار رہے گا۔ این ڈی ایم اے کے مطابق برفباری کے باعث پھسلن والی سڑکیں بالائی علاقوں میں ٹریفک کی روانی کو متاثر کرتی رہیں گی اور شمالی علاقوں کے کئی مقامات پر وقفے وقفے سے ہلکی برفباری ہو سکتی ہے۔

این ای او سی نے سیاحوں اور مسافروں کو غیر ضروری سفر سے گریز کرنے اور مقامی انتظامیہ کی جانب سے جاری ہدایات پر عمل کرنے کی ہدایت کی ہے۔

این ڈی ایم اے کا کہنا ہے کہ اس نے متوقع موسمی صورتحال اور ممکنہ خطرات کے پیش نظر متعلقہ اداروں کو پیشگی الرٹس جاری کر دیے ہیں تاکہ بروقت تیاری کو یقینی بنایا جا سکے۔