موٹرویز پر سفر کرنیوالے شہری ہوشیار! ایم ٹیگ سے متعلق اہم خبر آگئی

موٹرویز پر سفر کرنے والے شہریوں کیلئے حکام کی جانب سے گاڑی مالکان کو ہدایت کی گئی ہے کہ وہ پرانے ایم ٹیگ (M-Tag) مقررہ تاریخ سے پہلے تبدیل کروا لیں، کیونکہ پرانے ایم ٹیگ 31 مئی کو ختم ہو رہے ہیں۔

تفصیلات کے مطابق یکم جون سے پہلے شہری اپنی گاڑی کا نیا ایم ٹیگ مفت تبدیل کروا سکتے ہیں ، شہریوں کو سہولت دینے کیلئے پرانے ایم ٹیگ کی تبدیلی کا عمل فی الحال مفت رکھا گیا ہے، تاہم مقررہ تاریخ گزرنے کے بعد اس سہولت پر فیس عائد کر دی جائے گی۔

اعلامیے کے مطابق یکم جون سے ایم ٹیگ لگوانے یا تبدیل کروانے کی فیس 150 روپے مقرر کی جائے گی جبکہ یکم جولائی سے یہی فیس بڑھا کر 300 روپے کر دی جائے گی ،  اس لیے موٹروے پر سفر کرنیوالے شہریوں کو ہدایت کی گئی ہے کہ وہ کسی بھی اضافی خرچ یا پریشانی سے بچنے کیلئے بروقت اپنا نیا ایم ٹیگ حاصل کر لیں۔

اس حوالے سے موٹروے انتظامیہ کا کہنا ہے کہ پرانے ایم ٹیگ کی تاریخ ختم ہونے کے بعد شہریوں کو ٹول پلازوں پر مشکلات کا سامنا کرنا پڑ سکتا ہے، اس لیے تمام گاڑی مالکان کو چاہیے کہ وہ آخری تاریخ کا انتظار نہ کریں اور جلد از جلد اپنے قریبی ایم ٹیگ سینٹر سے رجوع کریں۔

یہ بھی پڑھیں : اسلام آباد میں داخل ہونیوالی تمام گاڑیوں پر ایم ٹیگ لازمی، پارکنگ میٹرز لگانے کا فیصلہ

حکام نے شہریوں سے اپیل بھی کی ہے کہ وہ سفر سے پہلے اپنے ایم ٹیگ کی تصدیق ضرور کر لیں تاکہ موٹروے پر داخلے کے وقت کسی قسم کی رکاوٹ پیش نہ آئے ، خاص طور پر روزانہ موٹروے استعمال کرنے والے افراد، کمرشل گاڑیوں کے مالکان اور لمبے سفر پر جانے والے شہری اس ہدایت پر فوری عمل کریں۔

ایم ٹیگ کیا ہے؟

ایم ٹیگ موٹروے کی جانب سے گاڑیوں کے لیے ایک سٹیکر ہے جو زیادہ تر وینڈ سکرین پر لگایا جاتا جس پر اپنا ایک بار کوڈ موجود ہوتا ہے۔

سٹیکر پر موجود بار کوڈ موٹروے کے پیمنٹ نظام کے ساتھ منسلک ہوتا ہے اور جب بھی ایم ٹیگ والی گاڑی ٹول پلازہ سے نکلتی ہے تو ٹول پلازے پر موجود بیریئر خود کار طریقے سے کھول جاتے ہیں اور ایم ٹیگ اکاؤنٹ سے ٹول ٹیکس کٹوتی ہو جاتی ہے ۔

اس کے مقابلے میں بغیر ایم ٹیگ گاڑیاں روایتی طریقے سے ٹول پلازے پر کیش دے کر ٹول ٹیکس ادا کرتی ہیں اور ادائیگی کے بعد ٹول پلازے کا بیریئر گاڑی کے لیے کھول دیا جاتا ہے۔

ایم ٹیگ کو ریچارج کیسے کیا جاتا ہے؟

موٹروے کے تمام تر ایم ٹیگ کا نظام ون نیٹ ورک نامی ادارے کے پاس ہے اور ٹول پلازوں پر اس ادارے کے مختلف دفاتر بنائے گئے ہیں ، مالک گاڑی کے رجسٹریشن کارڈ، شناختی کارڈ کی کاپی اور موبائل نمبر فراہم کر کے ایم ٹیگ سٹیکر حاصل کر سکتا ہے۔