پاکستان میں موٹر سائیکل استعمال کرنے والوں کے لیے خوش آئند خبر سامنے آ گئی ہے، ایٹلس ہونڈا نے اپنی مقبول موٹر سائیکلوں ہونڈا سی جی 125 اور ہونڈا سی ڈی 70 کے 2026 ماڈلز باضابطہ طور پر متعارف کرا دیے ہیں۔ کمپنی کی جانب سے دونوں ماڈلز کی نئی قیمتوں اور خصوصیات کا بھی اعلان کر دیا گیا ہے۔
ایٹلس ہونڈا کے مطابق سال 2026 کے ہونڈا سی جی 125 کی قیمت 2 لاکھ 38 ہزار 900 روپے مقرر کی گئی ہے۔ کمپنی کا کہنا ہے کہ 2025 اور 2026 ماڈلز کے درمیان انجن یا مکینیکل ساخت میں کوئی نمایاں تبدیلی نہیں کی گئی، تاہم نئی گرافکس، بہتر ڈیزائن اور ظاہری بہتریوں کے باعث موٹر سائیکل کو ایک تازہ اور نسبتاً جدید روپ دیا گیا ہے۔ سی جی 125 بدستور اپنی مضبوط باڈی، قابلِ اعتماد انجن اور بہتر کارکردگی کی وجہ سے پاکستانی سڑکوں پر مقبول ترین موٹر سائیکلوں میں شمار ہوتی ہے۔
نئے ماڈل میں یورو 2 معیار کے مطابق تیار کردہ 4 اسٹروک ایئر کولڈ انجن نصب ہے، جو کم ایندھن خرچ اور پائیداری کے لیے جانا جاتا ہے۔ موٹر سائیکل میں 4 اسپیڈ کانسٹنٹ میش گیئر باکس دیا گیا ہے، جبکہ 9.2 لیٹر فیول ٹینک (2 لیٹر ریزرو سمیت) طویل سفر کے دوران سہولت فراہم کرتا ہے۔ کمپنی کے مطابق سی جی 125 کا اوسط فیول ایوریج تقریباً 45 کلومیٹر فی لیٹر ہے۔ فرنٹ پر ٹیلی اسکوپک فورک اور پچھلے حصے پر سوئنگ آرم سسپنشن شامل ہے، جبکہ نئی پلین سیٹ اور پچھلے انڈیکیٹرز کی پوزیشن میں تبدیلی نے ڈیزائن کو مزید بہتر بنایا ہے۔
دوسری جانب ایٹلس ہونڈا نے ہونڈا سی ڈی 70 کے 2026 ماڈل کی قیمت ایک لاکھ 59 ہزار 900 روپے مقرر کی ہے۔ سی ڈی 70 اپنی شاندار مائلیج، مضبوط ساخت اور کم خرچ مینٹیننس کی وجہ سے عام صارفین میں طویل عرصے سے مقبول ہے۔ نئے ماڈل میں 4 اسٹروک OHC ایئر کولڈ انجن کے ساتھ 4 اسپیڈ کانسٹنٹ میش ٹرانسمیشن دی گئی ہے۔
سی ڈی 70 میں کک اسٹارٹ سسٹم شامل ہے جو ہر موسم میں آسان اسٹارٹ کو ممکن بناتا ہے۔ موٹر سائیکل میں 8.5 لیٹر فیول ٹینک (1 لیٹر ریزرو سمیت) اور مضبوط بیک بون فریم دیا گیا ہے، جو بہتر توازن اور استحکام فراہم کرتا ہے۔ یہ ماڈل بلیو، ریڈ اور بلیک رنگوں میں دستیاب ہوگا۔
By 
