چین ،کینیڈا معاہدہ تباہ کن ہوگا،ٹرمپ نے خبردار کر دیا

امریکی صدر ڈونلڈ ٹرمپ نے ایک بار پھر کینیڈا کو چین کے ساتھ کسی بھی ممکنہ معاہدے سے خبردار کرتے ہوئے کہا ہے کہ ایسا کوئی بھی اقدام کینیڈا کی تاریخ کے بدترین فیصلوں میں شمار ہوگا۔

سوشل میڈیا پر جاری اپنے بیان میں ڈونلڈ ٹرمپ نے شدید تشویش کا اظہار کرتے ہوئے دعویٰ کیا کہ چین نہایت مہارت اور منظم انداز میں کینیڈا پر اپنا اثر و رسوخ بڑھا رہا ہے، جبکہ کینیڈا خود کو دانستہ طور پر نقصان کی راہ پر گامزن کر رہا ہے۔ ان کا کہنا تھا کہ اگر کینیڈا نے چین کے ساتھ معاہدہ کیا تو اس کے نتائج ملک کیلئے تباہ کن ثابت ہوں گے۔

یہ بھی پڑھیں: امریکا اور کینیڈا تجارتی مذاکرات دوبارہ شروع نہیں ہونگے، صدرٹرمپ کا اعلان

ٹرمپ نے طنزیہ انداز میں یہ بھی کہا کہ انہیں امید ہے چین کم از کم کینیڈا کی قومی شناخت سمجھی جانے والی آئس ہاکی کو اس عمل سے محفوظ رکھے گا۔

واضح رہے کہ امریکہ کی جانب سے متعدد مواقع پر اس بات کا اظہار کیا جا چکا ہے کہ کینیڈا کے چین کے ساتھ بڑھتے ہوئے روابط پر واشنگٹن کو تحفظات لاحق ہیں۔ ڈونلڈ ٹرمپ مختلف اوقات میں کینیڈا کو امریکہ کی ریاست بنانے کا عندیہ بھی دیتے رہے ہیں۔

عالمی مبصرین کے مطابق ٹرمپ کا حالیہ بیان بھی اسی تناظر میں دیکھا جا رہا ہے، جو چین کے بڑھتے ہوئے عالمی اثر و رسوخ کے خلاف امریکی سوچ اور خدشات کی عکاسی کرتا ہے۔