آنکھ کی حرکت کے مطابق فوکس، جدید اسمارٹ چشمے متعارف

فن لینڈ کی کمپنی (IXI) نے جدید اسمارٹ چشمے متعارف کرائے ہیں جو صارف کی آنکھ کی حرکت کے مطابق خود بخود فوکس بدل سکتے ہیں۔

تفصیلات کے مطابق یہ چشمے بظاہر عام دکھائی دیتے ہیں، تاہم ان میں آنکھ کی حرکت ٹریک کرنے والے سینسرز اور لیکویڈ کرسٹل لینسز نصب ہیں جو دیکھنے کے فاصلے کے مطابق فوری طور پر فوکس ایڈجسٹ کرتے ہیں۔

روایتی شیشوں میں فکسڈ لینسز ہوتی ہیں اور بائی فوکل یا ویریفوکل لینسز میں قریب یا دور دیکھنے کے لیے آنکھ یا سر کی پوزیشن بدلنا پڑتی ہے، جبکہ IXI کے آٹو فوکس چشمے اس مسئلے کو ختم کرتے ہیں اور لینس کی فوکسنگ خود تبدیل ہو جاتی ہے۔

چشمے میں نصب لیکویڈ کرسٹل تہہ روشنی کو موڑنے کے طریقے کو بدلتی ہے، اور آئی ٹریکنگ سینسر اس بات کا تعین کرتے ہیں کہ صارف کس فاصلے پر نظر مرکوز کر رہا ہے۔ اس معلومات کی بنیاد پر لینس فوری طور پر قریب یا دور دیکھنے کے مطابق ڈھل جاتے ہیں۔

کمپنی کے مطابق ان چشموں کا وزن تقریباً 22 گرام ہے اور ڈیزائن بالکل عام چشموں جیسا ہے تاکہ صارف کو استعمال میں آسانی ہو۔ ابھی ان چشموں کی قیمت یا باضابطہ لانچ کی تاریخ جاری نہیں کی گئی ہے، اور یہ ترقیاتی مرحلے میں ہیں۔

مزید جانیئے:’’آنکھ جھپکنے میں میلوں سفر طے‘‘، چین کی نئی ٹیکنالوجی نے دُنیا کو حیران کردیا

ماہرین کا کہنا ہے کہ یہ ٹیکنالوجی مستقبل میں بائی فوکل اور ویریفوکل لینسز کی جگہ لے سکتی ہے اور بصارت درست کرنے کے روایتی طریقوں میں اہم تبدیلی لا سکتی ہے۔