پاک بھارت ٹاکرا،مخالف ٹیم کے خلاف کیسے کھیلنا ہے؟، جارح بلے باز صاحبزادہ فرحان کو والد کی اہم نصیحت؟

پاکستان کرکٹ ٹیم کے مایہ ناز بلے باز صاحبزادہ فرحان کے والد صاحبزادہ فرمان نے انکشاف کیا ہے کہ بیٹے نے اہم میچ سے قبل فون پر والدین اور پوری قوم سے پاکستان کی جیت کے لیے دعا کی اپیل کی ہے۔

آزاد ڈیجیٹل کے نمائندے ذیشان سے خصوصی گفتگو کرتے ہوئے صاحبزادہ فرمان نے بتایا کہ ‘فرحان نے کہا ہے کہ آپ سب دعا کریں، ہم پوری کوشش کریں گے کہ پاکستان کو فتح دلائیں’۔ انہوں نے کہا کہ ہم والدین اپنے بیٹے کے لیے دعا گو ہیں کہ وہ عمدہ کھیل پیش کرے اور قومی ٹیم کی جیت میں اہم کردار ادا کرے۔

یہ بھی پڑھیں:پاک بھارت ٹاکرا، دونوں ٹیموں کے کھلاڑیوں کے نام جاری، اہم تبدیلیاں بھی سامنے آگئیں

صاحبزادہ فرمان نے بتایا کہ انہوں نے بیٹے کو نصیحت کی ہے کہ ہمارا مقابلہ بھارت کی ایک انتہائی مضبوط اور منظم ٹیم کے ساتھ ہے، اس لیے میدان میں اعتماد، حوصلہ اور جارحانہ حکمت عملی کے ساتھ اترنا ہوگا۔ انہوں نے کہا کہ ‘ہم نے فرحان کو کہا ہے کہ چوکوں اور چھکوں کی بارش کر دو، خاص طور پر ابتدائی اوورز میں اوپنرز کو ہر حال میں کم از کم 70 رنز اسکور کرنا ہوں گے تاکہ حریف ٹیم پر دباؤ ڈالا جا سکے’۔

“صاحبزادہ فرحان چھکوں کا ماہر ہے اور پوری پاکستانی ٹیم میں اس کے مقابل کوئی نہیں، اس جیسے چھکے کوئی نہیں مار سکتا” نمائندہ آزاد ڈیجیٹل سید ذیشان کی کرکٹر صاحبزادہ فرحان کے گھر جا کر والد سے خصوصی گفتگو@RealSahibzada pic.twitter.com/ZWjWXjsJY7

— Azaad Urdu (@azaad_urdu) February 15, 2026

انہوں نے فخر سے کہا کہ صاحبزادہ فرحان ریکارڈ چھکے مارنے کی صلاحیت رکھتا ہے اور وہ چھکے لگانے کا ماہر ہے۔ ‘اگر اسے صرف دو اوور بھی مل گئے تو وہ بھارت کو نہیں چھوڑے گا’۔ انہوں نے مزید کہا کہ جب فرحان نے بمراہ کو چھکے مارے تو ایسا محسوس ہوا جیسے وہ پشاور کے کسی مقامی گراؤنڈ میں کھیل رہا ہو۔

یہ بھی پڑھیں:پاک، بھارت میچ سے قبل اچھی خبرآگئی

ایک سوال کے جواب میں صاحبزادہ فرمان نے جذباتی انداز میں کہا کہ ‘میں نے اسے کہا کہ آج کچھ ایسا کر دکھاؤ کہ دنیا میں نام بن جائے’۔ ان کا کہنا تھا کہ فرحان ہمیشہ بڑے میچز میں بہتر کارکردگی دکھانے کی صلاحیت رکھتا ہے۔

انہوں نے قومی ٹیم کے دیگر کھلاڑیوں پر بھی اعتماد کا اظہار کرتے ہوئے کہا کہ ‘ہمارا عثمان طارق انتہائی خطرناک بولر ہے، جب کہ محمد نواز اور خواجہ نافع بھی میرے پسندیدہ کھلاڑی ہیں، ہمیں پوری امید ہے کہ پاکستان ٹیم فتح حاصل کرے گی’۔

صاحبزادہ فرمان نے بیٹے کی کرکٹ جدوجہد کا ذکر کرتے ہوئے بتایا کہ ‘ہم نے اس کی کرکٹ کے لیے گاؤں سے شہر منتقل ہونے کا فیصلہ کیا تاکہ اسے بہتر سہولیات اور کوچنگ میسر آ سکے’۔ ان کا کہنا تھا کہ فرحان کی محنت، لگن اور خاندان کی قربانیوں کا مقصد صرف یہ ہے کہ وہ ملک و قوم کا نام روشن کرے۔

میچ سے قبل شائقینِ کرکٹ میں جوش و خروش عروج پر ہے اور سوشل میڈیا پر بھی صاحبزادہ فرحان کے لیے دعاؤں اور نیک تمناؤں کا سلسلہ جاری ہے۔