انٹرنیشنل کرکٹ کونسل (آئی سی سی) مینز ٹی20 ورلڈ کپ کے گروپ ڈی کے 31ویں میچ میں نیوزی لینڈ کرکٹ ٹیم نے شاندار آل راؤنڈ کارکردگی کا مظاہرہ کرتے ہوئے کینیڈا کرکٹ ٹیم کو آٹھ وکٹوں سے شکست دے دی اور ٹورنامنٹ میں اپنی پوزیشن مزید مستحکم کر لی۔
174 رنز کے ہدف کے تعاقب میں نیوزی لینڈ نے جارحانہ انداز اپنایا اور 15.1 اوورز میں صرف 2 وکٹوں کے نقصان پر 176 رنز بنا کر میچ 29 گیندیں قبل اپنے نام کر لیا۔ کیوی بیٹرز نے 11.60 کے شاندار رن ریٹ سے کھیلتے ہوئے کینیڈین باؤلرز کو بے بس کر دیا۔
اس سے قبل کینیڈا نے مقررہ 20 اوورز میں چار وکٹوں کے نقصان پر 173 رنز اسکور کیے۔ نوجوان اوپنر یوراج سمرا نے کیریئر کی یادگار اننگز کھیلتے ہوئے 65 گیندوں پر 110 رنز بنائے، جس میں 11 چوکے اور 6 فلک شگاف چھکے شامل تھے۔ کپتان دلپریت باجوا نے 39 گیندوں پر 36 رنز بنا کر ان کا بھرپور ساتھ دیا اور دونوں کے درمیان پہلی وکٹ کے لیے 116 رنز کی شراکت قائم ہوئی۔
تاہم آخری 5 اوورز میں کینیڈا کی بیٹنگ کی رفتار سست پڑ گئی اور وہ بڑا مجموعہ ترتیب دینے میں ناکام رہا۔ نیوزی لینڈ کی جانب سے میٹ ہنری، جیکب ڈفی، کائل جیمیسن اور جیمز نیشم نے ایک ایک وکٹ حاصل کی اور اہم مواقع پر رنز کا بہاؤ روکے رکھا۔
ہدف کے تعاقب میں نیوزی لینڈ کو ابتدا میں 2 جھٹکے لگے اور 30 رنز پر 2 کھلاڑی پویلین لوٹ گئے، تاہم اس کے بعد راچن رویندرا اور گلین فلپس نے میچ کا نقشہ بدل دیا۔ دونوں نے تیسری وکٹ کے لیے ناقابل شکست 146 رنز کی شراکت قائم کی۔
گلین فلپس نے 36 گیندوں پر 76 ناٹ آؤٹ رنز کی دھواں دار اننگز کھیلی، جس میں 4 چوکے اور 6 چھکے شامل تھے، جبکہ راچن رویندرا نے 39 گیندوں پر 59 رنز بنا کر ٹیم کی جیت یقینی بنائی۔
کینیڈین باؤلرز لائن اور لینتھ برقرار رکھنے میں ناکام رہے اور 14 اضافی رنز بھی دیے، جن میں 11 وائیڈز شامل تھیں، جو میچ کے نتیجے پر اثر انداز ہوئیں۔
اس فتح کے بعد نیوزی لینڈ کی گروپ ڈی میں سیمی فائنل کی دوڑ مزید مضبوط ہو گئی ہے، جبکہ کینیڈا کو یوراج سمرا کی شاندار سنچری کے باوجود شکست کا سامنا کرنا پڑا۔ کرکٹ ماہرین کے مطابق کیوی ٹیم کی بیٹنگ گہرائی اور تجربہ اسے ٹورنامنٹ کے مضبوط دعویداروں میں شامل کر رہا ہے۔
By 
