ایران امریکہ مذاکرت کہاں ہو رہے ہیں؟ ٹرمپ کا بڑا بیان سامنے آگیا

عالمی کشیدگی کے ماحول میں ایک اہم پیش رفت سامنے آئی ہے جہاں امریکی صدر ڈونلڈ ٹرمپ نے ایران کے حوالے سے سخت مؤقف کے بعد انکشاف کیا ہے کہ دونوں ممالک کے درمیان فون پر مذاکرات جاری ہیں۔ اس بیان نے سفارتی حلقوں میں نئی بحث چھیڑ دی ہے اور ممکنہ طور پر کشیدگی میں کمی کی امید بھی پیدا کر دی ہے۔

امریکی صدر نے اپنے بیان میں کہا کہ ایران کے ساتھ رابطے بحال ہیں اور بات چیت کا عمل جاری ہے تاہم انہوں نے اس بات پر زور دیا کہ ایران کو جوہری ہتھیار حاصل نہیں کرنے دیے جائیں گے۔ ٹرمپ کا کہنا تھا کہ امریکا ایران کے خلاف اپنے مقاصد بڑی حد تک حاصل کر چکا ہے اور ایران کو حقیقت تسلیم کرنا ہوگی۔

یہ بھی پڑھیں :ایران کو جوہری ہتھیا ر بنانے کی اجازت نہیں دے سکتے،ٹرمپ

انہوں نے مزید دعویٰ کیا کہ ایران کے بیشتر میزائل نظام کو تباہ کر دیا گیا ہے اور اس کی بحری صلاحیت کو بھی شدید نقصان پہنچایا گیا ہے جبکہ ایرانی معیشت خصوصاً کرنسی شدید دباؤ کا شکار ہے۔

امریکا اور ایران کے تعلقات گزشتہ کئی دہائیوں سے کشیدگی کا شکار رہے ہیں جن میں اتار چڑھاؤ آتا رہا ہے۔ خاص طور پر جوہری پروگرام کے معاملے پر دونوں ممالک کے درمیان شدید اختلافات رہے ہیں۔ ماضی میں عالمی طاقتوں کے ساتھ ہونے والے معاہدوں کے باوجود بارہا ایسے مواقع آئے جب یہ کشیدگی کھل کر سامنے آئی اور خطے میں جنگ کے خدشات بڑھ گئے۔ حالیہ عرصے میں بھی مشرق وسطیٰ کی صورتحال غیر یقینی کا شکار رہی ہے  جہاں مختلف واقعات نے دونوں ممالک کو ایک بار پھر آمنے سامنے لا کھڑا کیا۔

 یہ بھی پڑھیں :پاکستان زبردست ملک ہے،فیلڈ مارشل اور وزیراعظم شہباز شریف بہترین شخصیات ہیں،ڈونلڈ ٹرمپ

اقتصادی پابندیوں، سفارتی دباؤ اور عسکری بیانات نے ماحول کو مزید کشیدہ کیا جس کے اثرات عالمی منڈیوں اور تیل کی قیمتوں پر بھی پڑے۔ اسی تناظر میں اب جاری رابطوں اور مذاکرات کو نہایت اہم پیش رفت سمجھا جا رہا ہے، کیونکہ اگر یہ بات چیت کامیاب ہوتی ہے تو نہ صرف خطے میں امن کی راہ ہموار ہو سکتی ہے بلکہ عالمی سطح پر بھی اس کے مثبت اثرات مرتب ہونے کی توقع کی جا رہی ہے۔