میٹا کیجانب سے واٹس ایپ، فیس بک اور انسٹا گرام صارفین کیلئے بڑا اعلان

میٹا نے واٹس ایپ پلس، انسٹاگرام پلس اور فیس بک پلس متعارف کرا دیے ، جس میں نئی سبسکرپشن سروسز میں خصوصی فیچرز اور خفیہ اسٹوری ویونگ شامل ہیں۔

دنیا کی معروف ٹیکنالوجی کمپنی میٹا نے اپنے صارفین کے لیے ایک بڑا قدم اٹھاتے ہوئے واٹس ایپ پلس، انسٹاگرام پلس اور فیس بک پلس جیسی نئی بامعاوضہ سبسکرپشن سروسز متعارف کرا دی ہیں،  ان نئے فیچرز کی خبر نے سوشل میڈیا صارفین کی دلچسپی میں اضافہ کیا ہے، کیونکہ اب صارفین کو ایسے خصوصی آپشنز ملیں گے جو پہلے عام صارفین کے لیے دستیاب نہیں تھے۔

کمپنی کے مطابق اس اقدام کا مقصد صرف صارفین کو بہتر سہولیات فراہم کرنا نہیں بلکہ اشتہارات پر انحصار کم کرکے آمدنی کے نئے ذرائع پیدا کرنا بھی ہے۔ یہی وجہ ہے کہ میٹا کی یہ نئی حکمت عملی ٹیکنالوجی دنیا میں خاصی توجہ حاصل کر رہی ہے۔

واٹس ایپ پلس اور انسٹاگرام پلس کی قیمت کتنی ہوگی؟

میٹا کی جانب سے جاری تفصیلات کے مطابق انسٹاگرام پلس اور فیس بک پلس کی ماہانہ فیس 3.99 ڈالر مقرر کی گئی ہے، جبکہ واٹس ایپ پلس استعمال کرنے کے لیے صارفین کو 2.99 ڈالر ماہانہ ادا کرنا ہوں گے  تاہم کمپنی نے واضح کیا ہے کہ مختلف ممالک کے لیے مقامی قیمتوں کا اعلان بعد میں کیا جائے گا۔

ماہرین کا کہنا ہے کہ اگر یہ سروسز کامیاب رہیں تو مستقبل میں مزید پریمیم فیچرز بھی متعارف کرائے جا سکتے ہیں۔ دوسری جانب کچھ صارفین کا ماننا ہے کہ مفت پلیٹ فارمز پر فیس کا نفاذ عام صارفین کے لیے مشکلات پیدا کرسکتا ہے۔

انسٹاگرام پلس میں کون سے نئے فیچرز شامل ہوں گے؟

رپورٹس کے مطابق انسٹاگرام پلس استعمال کرنے والے صارفین یہ جان سکیں گے کہ ان کی اسٹوریز کتنی بار دوبارہ دیکھی گئی ہیں۔ اس کے علاوہ صارفین کو “کلوز فرینڈز” کی محدود فہرست سے آگے بڑھ کر لامحدود اسٹوری آڈینس لسٹس بنانے کی سہولت بھی ملے گی۔

دلچسپ بات یہ ہے کہ صارفین خفیہ انداز میں اسٹوریز دیکھ سکیں گے اور ان کا نام ویور لسٹ میں ظاہر نہیں ہوگا۔ یہی فیچر اس وقت سوشل میڈیا پر سب سے زیادہ زیر بحث ہے اور لوگ اس پر مختلف ردعمل دے رہے ہیں۔

صارفین کے لیے اس تبدیلی کے کیا اثرات ہوں گے؟

ٹیکنالوجی ماہرین کے مطابق میٹا کی نئی سبسکرپشن سروسز مستقبل میں سوشل میڈیا کے استعمال کا انداز بدل سکتی ہیں،  اگر صارفین ان فیچرز کو پسند کرتے ہیں تو دیگر کمپنیاں بھی اسی طرز کی سروسز متعارف کرا سکتی ہیں۔

دوسری جانب کئی صارفین نے خدشہ ظاہر کیا ہے کہ مستقبل میں مزید اہم فیچرز صرف بامعاوضہ صارفین تک محدود ہو سکتے ہیں ، یہی وجہ ہے کہ میٹا کا یہ اقدام آنے والے دنوں میں مزید بحث کا موضوع بن سکتا ہے۔