پاکستان میں سونے کی قیمتوں میں ایک روزہ کمی کے بعد دوبارہ تیزی کا رجحان دیکھنے میں آیا ہے جبکہ عالمی مارکیٹ میں بھی قیمتی دھات کی قیمت بڑھنے کے اثرات مقامی صرافہ بازاروں پر نمایاں رہے۔
عالمی سطح پر سونے کی قیمت میں اضافے کے بعد ملک بھر میں فی تولہ اور دس گرام سونے کی قیمتوں میں نمایاں اضافہ ریکارڈ کیا گیا جس سے زیورات خریدنے کے خواہشمند افراد کو ایک بار پھر مہنگائی کا سامنا کرنا پڑے گا۔
آل پاکستان صرافہ جیمز اینڈ جیولرز ایسوسی ایشن کے مطابق 24 قیراط فی تولہ سونے کی قیمت میں 1,100 روپے اضافہ ہوا جس کے بعد فی تولہ سونا 4 لاکھ 33 ہزار 536 روپے کا ہو گیا اسی طرح 10 گرام 24 قیراط سونے کی قیمت 943 روپے بڑھ کر 3 لاکھ 71 ہزار 687 روپے تک پہنچ گئی۔
دوسری جانب چاندی کی قیمت میں بھی اضافہ ریکارڈ کیا گیا صرافہ ایسوسی ایشن کے مطابق فی تولہ چاندی 30 روپے مہنگی ہونے کے بعد 6 ہزار 462 روپے کی سطح پر پہنچ گئی جس سے چاندی کے زیورات اور دیگر مصنوعات کی قیمتوں پر بھی اثرات مرتب ہونے کا امکان ہے۔
عالمی مارکیٹ میں بھی سونے کی قیمتوں میں تیزی دیکھی گئی جہاں فی اونس سونا 11 ڈالر اضافے کے بعد 4 ہزار 111 ڈالر پر ٹریڈ کرتا رہا۔ عالمی مارکیٹ میں قیمتوں میں اضافے کے باعث مقامی مارکیٹ پر بھی اس کے اثرات مرتب ہوئے اور سونے کی قیمتوں میں دوبارہ اضافہ ریکارڈ کیا گیا۔
ماہرین کے مطابق عالمی معاشی غیر یقینی صورتحال، سرمایہ کاروں کی محفوظ سرمایہ کاری کی جانب بڑھتی ہوئی توجہ، مرکزی بینکوں کی خریداری اور عالمی مالیاتی منڈیوں میں اتار چڑھاؤ کے باعث سونے کی قیمتوں میں مسلسل نرمی اور تیزی کا رجحان دیکھنے میں آ رہا ہے۔ ان کا کہنا ہے کہ اگر بین الاقوامی مارکیٹ میں یہی رجحان برقرار رہا تو آئندہ دنوں میں پاکستان میں سونے کی قیمتوں میں مزید ردوبدل کا امکان موجود ہے۔
صرافہ مارکیٹ سے وابستہ افراد کا کہنا ہے کہ مسلسل بڑھتی ہوئی قیمتوں کے باعث زیورات کی خریداری میں کمی دیکھی جا رہی ہے جبکہ زیادہ تر خریدار صرف ضرورت کے تحت خریداری کر رہے ہیں دوسری جانب سرمایہ کار سونے کو اب بھی محفوظ سرمایہ کاری تصور کرتے ہوئے اس میں دلچسپی برقرار رکھے ہوئے ہیں۔
By 
