نادرا نے پاک آئی ڈی موبائل ایپ کا نیا ورژن جاری کر دیا

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے لیے بڑی سہولت متعارف کراتے ہوئے پاک آئی ڈی موبائل ایپ کا نیا ورژن جاری کر دیا۔

نادرا کے مطابق پاک آئی ڈی موبائل ایپ کا نیا ورژن 5.6.6 ریلیز کر دیا گیا ہے، جس میں کارڈ دیکھیں کے نام سے نیا فیچر شامل کیا گیا ہے، اس فیچر کے ذریعے شہری درخواست جمع کروانے سے پہلے اپنا متوقع شناختی کارڈ دیکھ سکیں گے۔

نادرا نے بتایا کہ اب شہری شناختی کارڈ کی درخواست فائنل کرنے سے قبل کارڈ پر درج تمام معلومات کا جائزہ لے سکتے ہیں، جبکہ کسی بھی غلطی کی صورت میں متعلقہ معلومات میں فوری تصحیح بھی کی جا سکتی ہے۔

یہ بھی پڑھیں :سوشل میڈیا پر نادرا کا ڈیٹا لیک ہونے کے دعوے بے بنیاد قرار، وضاحت جاری

نادرا کے مطابق اس نئے فیچر کا مقصد شناختی کارڈ کے اجرا کے عمل کو مزید آسان، شفاف اور غلطیوں سے پاک بنانا ہے تاکہ شہریوں کو بہتر سہولت فراہم کی جا سکے۔

دوسری جانب نادرا نے خیبر پختونخوا میں بھی پاک آئی ڈی کے ذریعے پیدائش، وفات، شادی اور طلاق کے اندراج کی سہولت شروع کر دی ہے۔

پہلے مرحلے میں یہ سہولت ضلع پشاور کی تمام ولیج اور نیبر ہڈ کونسلز میں دستیاب ہوگی، جبکہ بعد ازاں اسے مرحلہ وار پورے صوبے تک وسعت دی جائے گی۔