لندن ،قومی کرکٹ ٹیم کے اعزاز میں خصوصی تقریب، پاکستانی کمیونٹی کا پرتپاک استقبال

قومی کرکٹ ٹیم کے اعزاز میں پاکستان ہاؤس لندن میں خصوصی عشائیے کا اہتمام کیا گیا جس میں قومی ٹیم کے کھلاڑیوں، ٹیم انتظامیہ، اعلیٰ حکام اور برطانیہ میں مقیم پاکستانی کمیونٹی کی اہم شخصیات نے شرکت کی۔ تقریب کا مقصد قومی کرکٹ ٹیم کی حوصلہ افزائی اور انگلینڈ کے دورے کے دوران کھلاڑیوں کی پذیرائی کرنا تھا۔

پاکستان ہاؤس لندن میں منعقدہ عشائیے کی میزبانی برطانیہ میں پاکستان کے ہائی کمشنر ڈاکٹر محمد فیصل نے کی جبکہ وفاقی وزیر داخلہ اور چیئرمین پاکستان کرکٹ بورڈ محسن نقوی تقریب کے مہمان خصوصی تھے۔ تقریب میں برطانیہ میں پاکستان کے سفارتی حکام کے علاوہ اسلام آباد میں تعینات برطانوی ہائی کمشنر جین میریٹ نے بھی شرکت کی۔

عشائیے کے موقع پر پاکستانی کرکٹ ٹیم کے کھلاڑیوں کا پاکستانی کمیونٹی کی جانب سے پرتپاک استقبال کیا گیا۔ کمیونٹی ارکان نے قومی کھلاڑیوں سے ملاقات کی اور ان کے ساتھ تصاویر بھی بنوائیں۔ اس موقع پر کھلاڑیوں کے لیے آنے والے میچز میں کامیابی اور عمدہ کارکردگی کے لیے نیک خواہشات کا اظہار کیا گیا۔

 یہ بھی پڑھیں :کرکٹ شائقین کو بڑا جھٹکا، پاکستان کرکٹ ٹیم کی رینکنگ بھی گرگئی اور جرمانہ بھی عائد

تقریب سے خطاب کرتے ہوئے محسن نقوی نے قومی کرکٹ ٹیم کے کھلاڑیوں کی حوصلہ افزائی کی اور کہا کہ پوری قوم کی نظریں قومی ٹیم پر ہیں۔ انہوں نے کھلاڑیوں پر زور دیا کہ وہ میچز کے دوران دباؤ کو نظر انداز کرتے ہوئے اپنی بہترین صلاحیتوں کا مظاہرہ کریں اور ملک کا نام روشن کرنے کے لیے بھرپور محنت کریں۔

محسن نقوی نے قومی ٹیم کے کھلاڑیوں کو یقین دلایا کہ پوری قوم ان کے ساتھ کھڑی ہے اور پاکستانی شائقین کو ٹیم سے بڑی امیدیں وابستہ ہیں۔ انہوں نے کھلاڑیوں کی حوصلہ افزائی کرتے ہوئے کہا کہ انہیں میدان میں اعتماد کے ساتھ اپنی صلاحیتوں کا اظہار کرنا چاہیے۔

تقریب میں میئر لندن صادق خان نے بھی شرکت کی اور قومی کرکٹ ٹیم کے کھلاڑیوں سے ملاقات کی۔ صادق خان نے پاکستانی کھلاڑیوں کے ساتھ گفتگو کی اور قومی ٹیم کے لیے نیک خواہشات کا اظہار کیا۔ انہوں نے کپتان بابر اعظم اور قومی ٹیم کے فاسٹ باؤلرز کی بھی تعریف کی۔

پاکستانی کمیونٹی کے نمائندوں نے اس موقع پر قومی ٹیم کے کھلاڑیوں سے ملاقات کو اپنے لیے اعزاز قرار دیا۔ کھلاڑیوں کے ساتھ تصاویر بنانے کا سلسلہ بھی جاری رہا جبکہ تقریب کے دوران پاکستان اور برطانیہ کے درمیان کرکٹ کے ذریعے مضبوط روابط اور پاکستانی کمیونٹی کے کردار کا بھی اظہار ہوا۔

 یہ بھی پڑھیں :پاکستان کے خلاف ٹیسٹ اسکواڈ میں شامل انگلینڈ کے فاسٹ بولر کو گرفتاری کے بعدا ایک اور بڑا دھچکا

قومی ٹیم کے اعزاز میں ہونے والی تقریب نے کھلاڑیوں کو بیرون ملک موجود پاکستانی کمیونٹی کے قریب آنے کا موقع بھی فراہم کیا۔ اس موقع پر پاکستانی شائقین نے قومی ٹیم کی کامیابی کے لیے اپنی بھرپور حمایت کا اظہار کیا اور امید ظاہر کی کہ کھلاڑی آنے والے اہم مقابلوں میں بہترین کارکردگی کا مظاہرہ کرتے ہوئے پاکستان کے لیے کامیابیاں حاصل کریں گے