ملک میں نئے صوبوں اور انتظامی یونٹس کے قیام کا معاملہ ایک بار پھر سیاسی بحث کا مرکز بن گیا ہے حکمران جماعت پاکستان مسلم لیگ (ن) نے نئے صوبوں کے قیام کے حوالے سے اپنی حمایت کو پاکستان پیپلز پارٹی کی رضامندی سے مشروط کرنے کا فیصلہ کیا ہے۔
میڈیا رپورٹس کے مطابق مسلم لیگ (ن) کی جانب سے واضح مؤقف اختیار کیا گیا ہے کہ پارٹی تنہا نئے صوبوں کے قیام کی حمایت نہیں کرے گی بلکہ اس معاملے پر اتحادی جماعت پیپلز پارٹی کو بھی اعتماد میں لینا ضروری ہوگا۔
ن لیگی ذرائع کا کہنا ہے کہ ملک میں نئے صوبوں کے قیام کا معاملہ انتہائی حساس نوعیت کا ہے اس لیے حکومت میں شامل بڑی سیاسی جماعتوں کے درمیان اتفاقِ رائے کے بغیر اس حوالے سے کوئی قدم نہیں اٹھایا جائے گا۔
ذرائع کے مطابق مسلم لیگ (ن) کے اندر یہ رائے بھی سامنے آئی ہے کہ اگر سندھ کی تقسیم یا سندھ میں نئے صوبے کے قیام کے معاملے پر پیپلز پارٹی آمادہ نہیں ہوتی تو پھر ملک میں کسی نئے صوبے کے قیام کی حمایت نہیں کی جائے گی۔
یعنی ن لیگ کے اندر زیرِ غور فارمولے کے مطابق نئے صوبوں کے معاملے پر پیش رفت اسی صورت میں ممکن ہوگی جب سندھ کے حوالے سے بھی کوئی متفقہ راستہ نکالا جائے۔
یہ پیش رفت ایک ایسے وقت میں سامنے آئی ہے جب ملک بھر میں نئے صوبوں اور انتظامی یونٹس کے قیام کی بحث دوبارہ شدت اختیار کرگئی ہے۔ سندھ اسمبلی میں بھی گزشتہ روز نئے صوبوں کے قیام کے معاملے پر بحث ہوئی جس میں حکومتی اور اپوزیشن ارکان نے آئینی اور سیاسی پہلوؤں پر اظہارِ خیال کیا۔
پیپلز پارٹی کی جانب سے یہ بھی مؤقف سامنے آیا ہے کہ نئے صوبوں کے قیام سے متعلق کسی بھی اقدام میں آئینی تقاضوں کے ساتھ ساتھ وسائل کی تقسیم، این ایف سی ایوارڈ، قومی اسمبلی اور سینیٹ میں نمائندگی جیسے اہم معاملات کو بھی مدنظر رکھنا ہوگا۔
نئے صوبوں کا معاملہ پاکستان میں کئی برس سے سیاسی اور انتظامی بحث کا موضوع رہا ہے۔ جنوبی پنجاب سمیت مختلف علاقوں میں الگ صوبے کے مطالبات سامنے آتے رہے ہیں، جبکہ حالیہ دنوں میں انتظامی بنیادوں پر ملک میں نئے یونٹس کے قیام کی بحث دوبارہ نمایاں ہوئی ہے۔
مسلم لیگ (ن) کے ذرائع سے سامنے آنے والے نئے مؤقف نے اس بحث کو ایک نئی سمت دے دی ہے کیونکہ اب نئے صوبوں کے قیام کی حمایت کو سندھ کے معاملے اور پیپلز پارٹی کی رضامندی سے جوڑا جا رہا ہے۔
تاہم اس حوالے سے ابھی تک وفاقی حکومت یا مسلم لیگ (ن) کی جانب سے باضابطہ طور پر ایسا کوئی آئینی پیکیج یا حتمی فیصلہ سامنے نہیں آیا جس کے تحت نئے صوبوں کے قیام کا عملی عمل شروع کردیا گیا ہو۔ اس لیے موجودہ صورتحال میں ن لیگی ذرائع کا مؤقف سیاسی جماعت کے اندر زیرِ بحث فارمولے کے طور پر دیکھا جا رہا ہے۔
