گیس صارفین کو بڑا جھٹکا، ایل پی جی سلنڈرز کی ڈلیوری بند

سوئی ناردرن گیس پائپ لائنز لمیٹڈ کے پاس ایل پی جی سلنڈرز کا اسٹاک ختم ہوگیا جس کے باعث صارفین کو کمپنی کی جانب سے ایل پی جی سلنڈرز کی ڈلیوری کا سلسلہ مکمل طور پر روک دیا گیا ہے۔

ذرائع کے مطابق ایل پی جی سلنڈرز فراہم کرنے والے سپلائرز نے قیمتوں میں عدم استحکام کے باعث سوئی ناردرن کو سلنڈرز کی مزید ڈلیوری روک دی، جس کے نتیجے میں کمپنی کے پاس موجود اسٹاک بھی ختم ہوگیا۔

ذرائع کا کہنا ہے کہ سپلائرز نے اوگرا کی جانب سے مقرر کردہ نرخ پر ایل پی جی سلنڈرز فراہم کرنا تھے، جبکہ سوئی ناردرن گیس کمپنی یہ سلنڈرز صارفین کو مقررہ قیمت کے ساتھ ڈلیوری چارجز وصول کرکے فراہم کرتی تھی۔

تاہم سپلائرز کی جانب سے نئی ڈلیوری روک دیے جانے کے بعد کمپنی کے پاس صارفین کے آرڈرز پورے کرنے کیلئے سلنڈرز دستیاب نہیں رہے، جس کے باعث ایل پی جی سلنڈرز کی ڈلیوری عارضی طور پر مکمل طور پر بند کردی گئی ہے۔

ذرائع کے مطابق سوئی ناردرن گیس کمپنی کے حکام اور ایل پی جی سلنڈرز فراہم کرنے والے سپلائرز کے درمیان مذاکرات جاری ہیں۔ کمپنی حکام سپلائرز کے تحفظات دور کرنے اور سپلائی بحال کرنے کیلئے بات چیت کررہے ہیں۔

یہ بھی پڑھیں:گاڑی خریدنے والوں کے لیے بڑی خوشخبری، بنک کی نئی آفر آ گئی

ذرائع کا کہنا ہے کہ اگر کمپنی اور سپلائرز کے درمیان مذاکرات کامیاب ہوگئے تو ایل پی جی سلنڈرز کی سپلائی دوبارہ شروع کردی جائے گی اور صارفین کیلئے ڈلیوری سروس بھی بحال ہوسکے گی۔

سوئی ناردرن پہلے سے ایل پی جی سلنڈر آرڈر کرنے کیلئے صارفین کو آن لائن سہولت بھی فراہم کرتی ہے۔ کمپنی کی SNGPL ConnectOn LPG ایپ کے ذریعے صارفین ایل پی جی سلنڈر آرڈر کرنے اور اپنے آرڈر کی ہسٹری چیک کرنے کی سہولت حاصل کرسکتے ہیں۔

دوسری جانب لاہور میں ایل پی جی کی قیمتوں کے حوالے سے بھی صارفین کو مشکلات کا سامنا ہے۔ رپورٹ کے مطابق شہر میں مختلف مقامات پر اوگرا کے مقررہ نرخ پر ایل پی جی دستیاب نہیں، جبکہ بعض نجی ڈسٹری بیوٹرز اور دکاندار اپنی مرضی کے نرخ وصول کررہے ہیں۔

سوئی ناردرن کی جانب سے سرکاری نرخ کے تحت ایل پی جی سلنڈرز فراہم کرنے کا مقصد بالخصوص ان صارفین کو متبادل ایندھن کی سہولت دینا ہے جہاں گیس پریشر یا گیس کی دستیابی کا مسئلہ موجود ہو۔

کمپنی کی جانب سے سلنڈرز کی سپلائی بند ہونے کی صورت میں صارفین کو نجی مارکیٹ سے ایل پی جی خریدنا پڑ سکتی ہے، جہاں قیمتوں میں فرق ان کیلئے اضافی مالی بوجھ کا سبب بن سکتا ہے۔

اس صورتحال میں صارفین کی نظریں سوئی ناردرن اور سپلائرز کے درمیان جاری مذاکرات پر مرکوز ہیں۔ مذاکرات کامیاب ہونے اور سلنڈرز کی نئی کھیپ کمپنی کو موصول ہونے کے بعد ہی صارفین کیلئے ڈلیوری سروس معمول پر آنے کی توقع ہے۔

سوئی ناردرن کی سرکاری ویب سائٹ پر ایل پی جی سلنڈر کیلئے صارفین کو درخواست دینے کی سہولت بدستور موجود ہے تاہم موجودہ سپلائی صورتحال کے باعث نئے آرڈرز کی تکمیل متاثر ہوسکتی ہے۔