پاکستان سپر لیگ (پی ایس ایل) کے 12ویں ایڈیشن کو آئندہ سال جنوری میں منعقد کرانے کی تجویز زیر غور ہے، جبکہ لیگ کے شیڈول اور دیگر معاملات پر پاکستان کرکٹ بورڈ (پی سی بی) اور فرنچائز مالکان کے درمیان مشاورت جاری ہے۔
کرکٹ سے متعلق ویب سائٹ کی رپورٹ کے مطابق پی ایس ایل کے آئندہ ایڈیشن کے انعقاد کے لیے جنوری کی ونڈو پر غور کیا جا رہا ہے،اس حوالے سے پی سی بی اور لیگ کی فرنچائزز کے مالکان کے درمیان بات چیت جاری ہے۔
گورننگ کونسل کا اجلاس
رپورٹ کے مطابق یکم ستمبر کو لندن میں ہونے والے پی ایس ایل گورننگ کونسل کے اجلاس میں لیگ کے ممکنہ شیڈول سمیت مختلف تجاویز کا جائزہ لیا گیا، اجلاس میں جنوری میں ٹورنامنٹ کرانے کے امکانات اور اس سے متعلق انتظامی امور پر بھی تبادلہ خیال کیا گیا۔
غیر ملکی کھلاڑیوں کی دستیابی
جنوری میں پی ایس ایل کے انعقاد کی صورت میں سب سے اہم مسئلہ غیر ملکی کھلاڑیوں کی دستیابی کو قرار دیا گیا ہے، اس عرصے میں مختلف ممالک کی جانب سے بین الاقوامی سیریز اور دیگر کرکٹ سرگرمیوں کے باعث غیر ملکی کھلاڑیوں کی شرکت متاثر ہونے کا خدشہ ہے۔
دھند بھی بڑا مسئلہ
پنجاب میں جنوری اور فروری کے دوران شدید سردی اور دھند کے باعث بھی میچز کے انعقاد پر تحفظات سامنے آئے ہیں، خاص طور پر دھند کی وجہ سے میچز کے اوقات، سفری معاملات اور نشریاتی شیڈول متاثر ہونے کا خدشہ موجود ہے۔
اضافی ٹورنامنٹ کی تجویز
دوسری جانب سال کے وسط میں ایک اضافی ٹورنامنٹ منعقد کرانے کی تجویز بھی زیر غور ہے، اس اقدام کا مقصد لیگ سے وابستہ فرنچائزز اور براڈکاسٹرز کے لیے آمدن کے مزید مواقع پیدا کرنا بتایا جا رہا ہے۔
حتمی فیصلہ باقی
تاہم پی ایس ایل کے 12ویں ایڈیشن کے حتمی شیڈول اور انعقاد کی تاریخ کے بارے میں فیصلہ ابھی ہونا باقی ہے، پی سی بی اور فرنچائز مالکان کی مشاورت کے بعد لیگ کی تاریخ اور دیگر تفصیلات طے کیے جانے کا امکان ہے۔
By 
