آبنائے ہرمز کے قریب ڈوبنے والے کارگو جہاز سے برآمد ہونے والے ایپل آئی فونز ایران میں غیر معمولی طور پر کم قیمتوں پر فروخت کیے جانے کے دعوے سامنے آئے ہیں۔ ان فونز کے اشتہارات میں انہیں ’’جنگی مالِ غنیمت‘‘ قرار دیا جا رہا ہے۔
پروپاکستانی کی 16 اکتوبر کی رپورٹ کے مطابق، سنگاپور کے پرچم بردار کارگو جہازجی ایف سی پرائیڈ کے 14 اکتوبر کو ڈوبنے کے بعد اس میں موجود آئی فونز اور فرانسیسی پرفیوم سمندر میں جا گرے۔ رپورٹ میں دعویٰ کیا گیا کہ جمعے کے روز سینکڑوں ایرانی ماہی گیر چھوٹی کشتیوں میں ان اشیا کو تلاش کرنے کے لیے آبنائے کی جانب روانہ ہوئے۔
تاہم، جہاز سے ملنے والی ہر ویڈیو یا فروخت کے اشتہار کی صداقت کی تصدیق نہیں ہوئی۔
ایران کی سائبر پولیس کے ڈپٹی سربراہ کرنل جواد مختار رضائی نے خبردار کیا کہ سستے آئی فونز کے نام پر جعلی اشتہارات کے ذریعے لوگوں کو دھوکا دیا جا سکتا ہے۔ جعل ساز خریداروں سے پیشگی رقم یا ڈیلیوری چارجز وصول کرکے غائب ہو سکتے ہیں۔
انہوں نے خریداروں کو مشورہ دیا کہ فون دیکھنے اور فروخت کنندہ کی شناخت کی تصدیق کرنے سے پہلے کوئی رقم ادا نہ کریں۔
حکام کے مطابق، اگر فون واقعی سمندر سے نکالے گئے ہیں تو ان میں بھی خرابی کا خطرہ موجود ہے۔ سمندری پانی سرکٹ بورڈ، بیٹری اور ڈسپلے کو نقصان پہنچا سکتا ہے۔ اس کے علاوہ، ایران کے حمٹا ڈیوائس رجسٹریشن نظام میں رجسٹر نہ ہونے والے فونز کی موبائل نیٹ ورک سروس بھی متاثر ہوسکتی ہے۔ ایسے فونز پر سرکاری وارنٹی اور باقاعدہ رسید نہ ملنے کا امکان بھی ہے۔
جہاز کے ڈوبنے کی تصدیق سنگاپور کے بحری حکام نے کی، جن کے مطابق جہاز کے تمام 21 افراد کو بحفاظت نکال لیا گیا تھا۔ دوسری جانب، ایران کے پاسداران انقلاب نے دعویٰ کیا تھا کہ جہاز ایک غیر مجاز راستے پر سفر کرتے ہوئے بارودی سرنگ سے ٹکرایا۔
ادھر فیکٹ چیک کرنے والے اداروں، بشمول ایران کے فیکٹ نامہ اور الجزیرہ، نے آئی فونز کی برآمدگی سے متعلق بعض وائرل ویڈیوز کو مصنوعی ذہانت سے تیار کردہ قرار دیا ہے۔ اس لیے سستے آئی فونز کی فروخت سے متعلق اشتہارات اور وائرل ویڈیوز پر یقین کرنے سے پہلے ان کی آزادانہ تصدیق ضروری ہے۔
By 
