سعودی شاہی خاندان کی شہزادی مشاعل بنت سعود بن محمد بن عبدالعزیز انتقال کرگئیں سعودی ایوانِ شاہی نے شہزادی کے انتقال کی تصدیق کرتے ہوئے ان کے لیے رحمت و مغفرت اور بلندیٔ درجات کی دعا کی ہے۔
سعودی پریس ایجنسی کی جانب سے جاری کردہ اعلان میں بتایا گیا ہے کہ شہزادی مشاعل بنت سعود بن محمد بن عبدالعزیز وفات پا گئی ہیں۔ ان کے انتقال کی خبر سامنے آنے کے بعد سعودی ایوانِ شاہی کی جانب سے تعزیتی پیغام بھی جاری کیا گیا۔
سعودی ایوانِ شاہی کے مطابق شہزادی کی نمازِ جنازہ بدھ کو نمازِ عصر کے بعد ریاض کی جامع مسجد امام ترکی بن عبداللہ میں ادا کی جائے گی۔
ایوانِ شاہی نے دعا کی کہ اللہ تعالیٰ مرحومہ کی مغفرت فرمائے، انہیں اپنی وسیع رحمت میں جگہ عطا کرے اور ان کے درجات بلند فرمائے۔ بیان میں لواحقین کے لیے بھی صبرِ جمیل اور اجر کی دعا کی گئی۔
سعودی شاہی خاندان کی جانب سے جاری کردہ اعلان میں شہزادی کے انتقال پر افسوس کا اظہار کیا گیا، تاہم ان کی عمر، انتقال کی وجہ اور دیگر ذاتی تفصیلات کے حوالے سے مزید معلومات فراہم نہیں کی گئیں۔
