پاکستان میں موسمیاتی پیش گوئی کا نیا نظام تیار، قدرتی آفات سے پہلے خبردار کرنے کی تیاری

پاکستان نے موسمیاتی پیش گوئی کے لیے ایسا نظام تیار کیا ہے جو آئندہ 12 ماہ تک کے موسمی رجحانات کا اندازہ فراہم کرنے کی صلاحیت رکھتا ہے۔ اس نظام کو مزید بہتر بنانے اور قدرتی آفات سے پہلے مؤثر اقدامات کرنے پر کام جاری ہے۔

وفاقی وزیر خزانہ محمد اورنگزیب نے 23 اکتوبر کو نیشنل ڈیزاسٹر مینجمنٹ اتھارٹی (این ڈی ایم اے) کے سبکدوش ہونے والے چیئرمین لیفٹیننٹ جنرل انعام حیدر ملک اور نئے چیئرمین لیفٹیننٹ جنرل حسن خٹک سے ملاقات کے دوران موسمیاتی پیش گوئی کے نظام اور اس کی صلاحیتوں میں اضافے کے اقدامات پر تبادلہ خیال کیا۔

محمد اورنگزیب نے کہا کہ موسمیاتی تبدیلی اور آبادی میں تیزی سے اضافہ پاکستان کو درپیش دو بڑے چیلنجز ہیں۔ ان کے اثرات ملکی معیشت، غذائی تحفظ، عوامی زندگی اور سرکاری مالی وسائل پر مرتب ہو رہے ہیں۔

یہ بھی پڑھیں:دنیا کا انوکھا جنگل، جہاں 47 ہزار درختوں کی جڑ ایک ہی ہے

ان کے مطابق عالمی مالیاتی فنڈ اور عالمی بینک کے حالیہ سالانہ اجلاسوں میں بھی پاکستان پر موسمیاتی تبدیلی کے اثرات اور ان سے نمٹنے کے اقدامات پر بین الاقوامی شراکت داروں سے بات چیت کی گئی۔

موسمیاتی پیش گوئی اور بروقت وارننگ پر توجہ

ملاقات میں این ڈی ایم اے کی جانب سے موسمیاتی پیش گوئی کے نظام اور اسے مزید مؤثر بنانے کے لیے جاری کوششوں پر بریفنگ دی گئی۔

وفاقی وزیر خزانہ نے زور دیا کہ موسمیاتی پیش گوئیوں کو بروقت فیصلوں اور مؤثر ابتدائی انتباہی اقدامات میں تبدیل کرنا ضروری ہے۔ اس مقصد کے لیے محکمہ موسمیات پاکستان اور دیگر متعلقہ اداروں کے درمیان بہتر رابطہ کاری پر بھی توجہ دی جا رہی ہے۔

این ڈی ایم اے کی قیادت نے گلوبل ریزیلینس ہب اور جدید ٹیکنالوجی سے متعلق اقدامات کا ذکر کیا، جن کا مقصد قدرتی آفات کے بعد ردعمل دینے کے بجائے خطرات کی پیشگی نشاندہی اور نقصانات کم کرنے کے لیے پہلے سے تیاری کرنا ہے۔

موسمیاتی سائنس میں مقامی مہارت بڑھانے کا منصوبہ

اجلاس میں اس بات پر بھی زور دیا گیا کہ پاکستان میں موسمیاتی سائنس اور پیش گوئی کے شعبے میں مقامی ماہرین تیار کیے جائیں۔ اس کے لیے خصوصی تربیت، تکنیکی عملے کی تیاری اور اداروں کی ذمہ داریوں کا واضح تعین اہم قرار دیا گیا۔

یہ بھی پڑھیں:136 سال پرانی پینٹنگ کا معمہ حل؟ سائنس دانوں نے آسمان کا سراغ لگا لیا

محمد اورنگزیب نے کہا کہ موسمیاتی تبدیلی سے نمٹنے، اس کے اثرات کم کرنے اور قدرتی آفات کے خطرات کو محدود کرنے کے لیے اداروں میں تسلسل اور تکنیکی صلاحیتوں کو طویل مدت تک برقرار رکھنا ضروری ہے۔

موسمیاتی تحفظ کے لیے فنڈز کی فراہمی پر زور

وفاقی وزیر خزانہ نے قدرتی آفات سے بچاؤ اور موسمیاتی تحفظ کے منصوبوں کے لیے ملکی وسائل استعمال کرنے کے ساتھ ساتھ عالمی ترقیاتی شراکت داروں سے تعاون حاصل کرنے کی ضرورت پر بھی زور دیا۔

انہوں نے کہا کہ ایسے منصوبوں کو ترجیح دی جانی چاہیے جن کے واضح اہداف ہوں اور جن کے نتائج کا جائزہ لیا جا سکے۔ ملاقات کے اختتام پر محمد اورنگزیب نے سبکدوش ہونے والے چیئرمین این ڈی ایم اے انعام حیدر ملک کی خدمات کو سراہا اور نئے چیئرمین حسن خٹک کے لیے نیک خواہشات کا اظہار کیا۔