برطانیہ سے تعلق رکھنے والے مارول کائنات کے دیوانےٹام ریڈفورڈ نے اپنے پسندیدہ ہیروز اور ولن کو خراجِ تحسین پیش کرتے ہوئے جسم پر 63 مارول کرداروں کے ٹیٹو بنوا کر نیا عالمی ریکارڈ قائم کر دیا۔
ٹام ریڈفورڈ نے اس منفرد شوق کے باعث گنیزورلڈ ریکارڈ میں جگہ بنا لی ہے۔ اس سے قبل یہ ریکارڈ ریان لاگسن اور رک سکولا میرو کے پاس مشترکہ طور پر تھا جن کے جسم پر 34، 34 مارول ٹیٹو موجود تھے۔
میڈیا رپورٹس کے مطابق ریڈفورڈ نے 2016 میں اپنے پہلے مارول ٹیٹو کا آغاز کیا تھا جب انہوں نے مشہور ولن تھانوس کا ٹیٹو اپنی ران پر بنوایا۔ان کے مطابق وہ ابتدا میں اس ٹیٹو کو ایسی جگہ چاہتے تھے جہاں اگر ڈیزائن پسند نہ آئے تو چھپایا جا سکےلیکن نتیجہ اس سے بھی بہتر نکلا اور پھر مزید ٹیٹو بنوانے کا سلسلہ شروع ہو گیا۔
ٹام ریڈفورڈ کا کہنا ہے کہ ان کا ابتدائی پلان تھا کہ ایک ٹانگ پر مارول ولن اور دوسری پر ہیروز کے ٹیٹو بنوائیں لیکن جگہ کم پڑنے کے باعث یہ ڈیزائن ان کی کمر اور جسم کے دیگر حصوں تک پھیل گیا۔
انہوں نے بتایا کہ بعد میں انہیں اس عالمی ریکارڈ کا علم ہوا اور پھر انہوں نے فیصلہ کیا کہ 40 سال کی عمر تک یہ ریکارڈ توڑنا ہے جو انہوں نے کامیابی سے حاصل کر لیا۔
By 
