ڈالر سمیت دیگر کرنسیاں سستی ہو گئیں

کاروباری ہفتے کے چوتھے روز انٹربینک میں ڈالر کی قدر میں کمی ریکارڈ کی گئی جبکہ دیگر کرنسیاں بھی سستی ہو گئیں۔ 

اسٹیٹ بینک آف پاکستان کی جانب سے جاری اعدادو شمار کے مطابق بدھ کو کاروبار کے اختتام پر ڈالر کی قیمت میں 8 پیسے کمی ہوئی ، جس کے بعد انٹر بینک میں ڈالر 278.04 روپے سے کم ہوکر 277.96 روپے پر بند ہوا۔

کاروبار کے آغاز انٹربینک میں ڈالر 4 پیسے کی کمی کے بعد 278 روپے پر ٹریڈ کر رہا تھا ، گزشتہ روز ڈالر معمولی اضافے کے بعد انٹربینک میں 278 روپے 04 پیسے پر بند ہو اتھا ۔

اوپن مارکیٹ کی بات کریں تو امریکی ڈالر 5 پیسے کمی سے 278 روپے 95 پیسے کا ہوگیا ، جبکہ قیمت خرید 277 روپے 40 پیسے اور قیمت فروخت 279 روپے رہی۔

دیر بڑی کرنسیوں میں یورو 1 روپے 15 پیسے کی کمی کے بعد 293 روپے 13 پیسے اور برطانوی پاؤنڈ 1 روپے 47 پیسے سستا ہونے کے بعد 351 روپے 83 پیسے کا ہو گیا ہے ۔

خلیجی کرنسیوں میں یو اے ای درہم 3 پیسے کمی سے 76.01 روپے اور سعودی ریال معمولی کمی کے بعد74.23 روپے کا ہوگیا۔

دوسری جانب عالمی اور مقامی گولڈ مارکیٹس میں سونے کی قیمتوں میں آج پھر بڑا اضافہ ہوگیا۔آل پاکستان جیمز اینڈ جیولرز ایسوسی ایشن کے مطابق مقامی مارکیٹ میں سونے کی قیمت میں 3700 روپے کا اضافہ ہوا۔

اضافے کے بعد 24 قیراط فی تولہ سونے کی قیمت 2 لاکھ 78 ہزار روپے تک پہنچ گئی۔ اسی طرح 10 گرام سونے کی قیمت میں بھی 3,172 روپے کا اضافہ ہوا اور یہ 2 لاکھ 38 ہزار 340 روپے تک پہنچ گئی۔

دوسری جانب عالمی مارکیٹ میں بھی سونے کی قیمتوں میں اضافہ ریکارڈ گیا گیا، جہاں فی اونس سونا 37 ڈالر مہنگا ہو کر 2,668 ڈالر کا ہو گیا ہے۔

علاوہ ازیں دوسری جانب پاکستان اسٹاک ایکس چینج میں ایک اور اہم سنگ میل عبور کرتے ہوئے 100 انڈیکس نے 97 ہزار پوائنٹس کی نفسیاتی حد کو پار کر لیا۔

کاروباری ہفتے کے چوتھے روز پاکستان اسٹاک مارکیٹ میں منفی آغاز کے باوجود تیزی دیکھنے کو ملی، جس کے باعث انڈیکس میں 1694 پوائنٹس کا نمایاں اضافہ ہوا۔

اس کے بعد 100 انڈیکس 97 ہزار 241 پوائنٹس پر ٹریڈ کرتا رہا اور ایک موقع پر یہ 97 ہزار 270 پوائنٹس تک پہنچ گیا۔