ایران فٹبال ورلڈ کپ کے میچ امریکہ میں ہی کھیلے گا، فیفا

فیفا کے مطابق ایران نے امریکا میں ہونے والے فیفا ورلڈ کپ 2026 میں اپنی شرکت کی تصدیق کر دی ہے اور اس بات کی بھی توثیق کی گئی ہے کہ ایران اپنے میچز امریکا میں ہی کھیلے گا۔

فیفا کے صدر جیانی انفانٹینو نے وینکوور میں ہونے والے فیفا کانگریس کے دوران کہا کہ سیاسی اور سفارتی کشیدگی کے باوجود ایران کی ٹیم ورلڈ کپ میں حصہ لے گی اور یہ فیصلہ برقرار رکھا گیا ہے کہ تمام میچز مقررہ میزبان ممالک میں ہی ہوں گے۔

انہوں نے کہا کہ فٹبال کا بنیادی مقصد دنیا کو جوڑنا ہے اور اسی اصول کے تحت یہ ایونٹ تمام ٹیموں کے لیے کھلا رکھا گیا ہے۔

 یہ بھی پڑھیں : جاپان کی ٹیم فیفا ورلڈ کپ 2026ء میں کوالیفائی کرنیوالی پہلی ٹیم بن گئی

رپورٹس کے مطابق ایران نے پہلے درخواست کی تھی کہ اس کے میچز امریکا کے بجائے کسی دوسرے ملک میں منتقل کیے جائیں تاہم فیفا نے اس درخواست کو مسترد کر دیا۔

یہ ورلڈ کپ 2026 امریکا، کینیڈا اور میکسیکو کی مشترکہ میزبانی میں منعقد ہوگا۔امریکی حکام کی جانب سے بھی اشارہ دیا گیا ہے کہ ایرانی کھلاڑیوں کو ایونٹ میں شرکت کی اجازت ہوگی تاہم سیکیورٹی اور ویزا سے متعلق بعض پابندیاں برقرار رہ سکتی ہیں، خصوصاً ایسے افراد کے لیے جن کے بعض اداروں سے تعلقات ہوں۔

  یہ بھی پڑھیں :فیفا ورلڈ کپ 2026ء کی کوریج کا جدید انداز؛ٹک ٹاک کے ساتھ غیر معمولی معاہدہ طے

ایران کی فیفا کانگریس میں عدم شرکت نے اس معاملے کو مزید حساس بنا دیا ہے، جبکہ عالمی سطح پر ایک بار پھر یہ بحث زور پکڑ رہی ہے کہ کھیل اور سیاست کو کس حد تک ایک دوسرے سے الگ رکھا جا سکتا ہے۔

ایران پہلے ہی ورلڈ کپ 2026 کے لیے کوالیفائی کر چکا ہے اور یہ اس کی تاریخ میں ساتویں بار عالمی فٹبال کپ میں شرکت ہوگی۔