پاکستان آسٹریلیا ون ڈے سیریز ،میچز کب اورکہاں ہوں گے ؟ تفصیلات سامنے آ گئیں

پاکستان اور آسٹریلیا کے درمیان ون ڈے سیریز کے ممکنہ شیڈول کی تفصیلات سامنے آ گئی ہیں جس کے مطابق دونوں ٹیموں کے درمیان سیریز رواں سال مئی کے آخر میں پاکستان میں کھیلے جانے کا امکان ہے۔

 جاری کردہ رپورٹس کے مطابق آسٹریلوی کرکٹ ٹیم مئی کے آخری ہفتے میں پاکستان کا دورہ کرے گی اور ون ڈے سیریز 31 مئی سے 4 جون کے درمیان منعقد ہونے کا امکان ہے۔ ابتدائی معلومات کے مطابق تمام میچز لاہور کے قذافی اسٹیڈیم میں کھیلے جائیں گے۔

ذرائع کا کہنا ہے کہ یہ سیریز پاکستان کرکٹ بورڈ اور کرکٹ آسٹریلیا کے درمیان طے پانے والے باہمی معاہدے کا حصہ ہے جس کا مقصد دونوں ٹیموں کو آئندہ بڑے ٹورنامنٹس، خاص طور پر ون ڈے ورلڈ کپ سے قبل بہتر تیاری کا موقع فراہم کرنا ہے۔

 یہ بھی پڑھیں : آسٹریلیا کا ایک بڑا نام پاکستان سپر لیگ کا حصہ بن گیا

سیریز کے بعد آسٹریلوی ٹیم کے بنگلا دیش روانہ ہونے کا بھی امکان ظاہر کیا جا رہا ہے جہاں وہ مزید ون ڈے میچز کھیل سکتی ہے۔ تاہم دونوں کرکٹ بورڈز کی جانب سے تاحال حتمی شیڈول کا باضابطہ اعلان نہیں کیا گیا اور اس پر مشاورت جاری ہے۔

پاکستان اور آسٹریلیا کے درمیان یہ سیریز نہ صرف شائقین کے لیے دلچسپ ہوگی بلکہ دونوں ٹیموں کے لیے عالمی مقابلوں سے قبل اپنی تیاریوں کو جانچنے کا اہم موقع بھی فراہم کرے گی۔