سلمان اکرم راجہ پی ٹی آئی سیکریٹری جنرل کے عہدے سے مستعفی

سلمان اکرم راجہ تحریک انصاف (پی ٹی آئی) کے سیکریٹری جنرل کے عہدے سے مستعفی ہو گئے۔

نجی ٹی وی نے ذرائع کے حوالے سے کہا ہے کہ سلمان اکرم راجہ نے استعفیٰ ذاتی وجوہات کی بنا پر دیا ہے، جسے انہوں نے پارٹی قیادت کو بھجوادیا ہے۔ چیئرمین پی ٹی آئی بیرسٹر گوہر خان نے سلمان اکرم راجہ کے استعفے کی تصدیق کی ہے۔

یہ استعفیٰ ایسے وقت میں سامنے آیا ہے جب 24 نومبر کو پی ٹی آئی کے احتجاج کے بعد خیبر پختونخوا کے رہنما شوکت یوسفزئی نے پی ٹی آئی پنجاب کی قیادت پر سوالات اٹھائے تھے۔

انہوں نے کہا تھا کہ ڈی چوک کے واقعے پر افسوس کا اظہار کرتے ہوئے یہ بھی پوچھا کہ پی ٹی آئی پنجاب کی قیادت کہاں تھی؟ کیا پارٹی کی قیادت بشریٰ بی بی چلائیں گی یا دیگر قائدین؟ انہوں نے مزید کہا کہ اگر پارٹی کی قیادت کے پاس اتنی طاقت نہیں تو انہیں استعفیٰ دے دینا چاہیے۔

شوکت یوسفزئی کے بیان پر ردعمل ظاہر کرتے ہوئے، سلمان اکرم راجہ نے کہا تھا کہ پی ٹی آئی کی تاریخ میں 24 نومبر کا دن بدترین تھا۔

انہوں نے کہا تھا کہ لوگ یہ سوال کرتے ہیں کہ وہ احتجاج میں کیوں نہیں پہنچ سکے، جبکہ وہ لاہور میں موجود تھے اور تمام راستے بند تھے، جس کی وجہ سے وہ احتجاج میں شامل نہیں ہو سکے۔