وزیر اطلا عات عطا تارڑ سے سندھ کے تعلیم یافتہ نوجوان کی ملاقات، ملازمت دلانے کی یقین دہانی

وفاقی وزیر اطلاعات عطا تارڑ نے سندھ کے شہر خیرپور سے تعلق رکھنے والے تعلیم یافتہ نوجوان اظہر میمن سے ملاقات کی اور انہیں روزگار کی فراہمی کے لیے مکمل تعاون اور ملازمت دلانے کی یقین دہانی کروائی ہے یہ ملاقات ایک جذباتی اور انسانی ہمدردی سے بھرپور لمحہ قرار دی جا رہی ہے۔

اظہر میمن کا تعلق خیرپور سے ہے اور انہوں نے2003 میں کراچی یونیورسٹی سے ایم بی اے کی ڈگری حاصل کی، وہ ایک اعلیٰ تعلیم یافتہ نوجوان ہیں جنہوں نے اپنی زندگی میں مختلف مشکلات اور معاشی چیلنجز کا سامنا کیا۔

حالیہ دنوں میں ان کی جدوجہد اور مشکلات پر مبنی ایک ویڈیو سماجی رابطوں کی ویب سائٹس پر سامنے آئی جس نے عوام کی توجہ حاصل کی، اس ویڈیو میں انہوں نے اپنے ماضی، تعلیم اور موجودہ حالات کے بارے میں تفصیل سے بتایا اور درپیش مسائل کو اجاگر کیا۔

خیر پور سندھ سے تعلق رکھنے والے انتہائی قابل اور اعلیٰ تعلیم یافتہ نوجوان اظہر میمن سے ملاقات ایک بے حد جذباتی لمحہ تھا۔ گزشتہ دنوں اُن کی ایک ویڈیو سوشل میڈیا پر وائرل ہوئی، جس میں وہ اپنے ماضی سے لے کر آج تک کے مشکل حالات کی کہانی بیان کر رہے تھے، اُنہوں نے کراچی یونیورسٹی سے… pic.twitter.com/vF04LCKNTd

— Attaullah Tarar (@TararAttaullah) April 29, 2026

وفاقی وزیر اطلاعات عطا تارڑ نے اس ویڈیو کا نوٹس لیتے ہوئے اظہر میمن سے ملاقات کی، اس ملاقات کے دوران انہوں نے نوجوان کی صلاحیتوں کو سراہا اور ان کی حوصلہ افزائی کی۔

انہوں نے اظہر میمن کو اسلام آباد آنے کی دعوت بھی دی تاکہ ان کے لیے بہتر مواقع تلاش کیے جا سکیں، عطا تارڑ نے اظہر میمن کواس بات کا یقین دلایا کہ حکومت ان کے لیے مناسب روزگار کے انتظامات کرے گی اور ان کی صلاحیتوں سے فائدہ اٹھانے کے لیے عملی اقدامات کیے جائیں گے۔

یہ واقعہ سماجی رابطوں کی ویب سائٹس پر بھی خوب زیر بحث ہے اور لوگ اسے ایک مثبت قدم اور انسانی ہمدردی کی عمدہ مثال قرار دے رہے ہیں۔