سندھ، جنوبی پنجاب اور بلوچستان آج سے گرمی کی لپیٹ میں رہینگے

محکمہ موسمیات کاکہنا ہے کہ آج سے سندھ، جنوبی پنجاب اور بلوچستان کے علاقے گرمی کی لہر کی لپیٹ میں رہیں گے،محکمہ موسمیات نے بلوچستان اور جنوبی پنجاب میں آج  سے 18 اپریل تک ہیٹ ویو کا الرٹ جاری کر دیا۔

محکمہ موسمیات کے مطابق  آج سے 18 اپریل کے دوران دن کا درجہ حرارت معمول سے 6 سے 8 ڈگری سینٹی گریڈ زیادہ رہنے کا امکان ہے جبکہ اسلام آباد، وسطی اور بالائی پنجاب، خیبرپختونخوا، کشمیر اور گلگت بلتستان میں پیر سے جمعہ کے دوران درجہ حرارت میں 4 سے 6 ڈگری اضافہ متوقع ہے، گرمی کی لہر کے باعث آندھی یا جھکڑ بھی چل سکتے ہیں۔

گزشتہ روز ملک میں سب سے زیادہ درجہ حرارت نواب شاہ، حیدرآباد اور دادو میں 43 ڈگری سینٹی گریڈ ، کراچی 39، بہاولپور، ڈیرہ اسماعیل خان37، لاہور، پشاور 35، اسلام آباد اور کوئٹہ میں 33 ڈگری ریکارڈ کیا گیا۔

ڈائریکٹر محکمہ موسمیات اسلام آباد ظہیر بابر نے کراچی سمیت ساحلی پٹی میں پارہ معمول سے زیادہ رہنے جبکہ میدانی علاقوں میں نمایاں اضافے کی پیشگوئی کردی۔

ادھر، صوبائی ڈیزاسٹر منیجمنٹ اتھارٹی (پی ڈی ایم اے) نے پنجاب میں رات کے اوقات میں بھی موسم گرم رہنے اور گرد آلود ہوائیں چلنے کی توقع ظاہر کردی۔

پی ڈی ایم اےکا کہنا تھا کہ اس سلسلے میں انتظامیہ کو تیاریوں کی ہدایات کردی گئیں، محکمہ موسمیات نے شہریوں کو احتیاطی تدابیر اپنانے اور پانی کا استعمال بڑھانے کا مشورہ دیا ہے۔