گلیشیئر جھیلیں پھٹنے کا خدشہ، پی ڈی ایم اے نے حساس اضلاع کو الرٹ جاری کر دیا

گلیشیئر جھیلیں پھٹنے کے خدشہ کے پیش نظر پی ڈی ایم اے نے حساس اضلاع کو الرٹ جاری کر دیا ہے۔

پی ڈی ایم اے خیبرپختونخوا نے گلاف (گلیشیئرز جھیلوں کے پھٹنے) کے خدشے کے پیش نظر صوبے کے شمالی اضلاع میں الرٹ جاری کر دیا ہے۔

محکمے کے مطابق حالیہ دنوں میں درجہ حرارت میں غیر معمولی اضافہ دیکھا گیا ہے جس کے باعث جھیلوں کے پھٹنے اور سیلابی صورتحال پیدا ہونے کا خطرہ بڑھ گیا ہے۔

پشاور: لوڈ شیڈنگ کے خلاف احتجاج، ایم پی اے فضل الہٰی نے تین گرڈ اسٹیشنز کا کنٹرول سنبھال لیا

پی ڈی ایم اے نے چترال اپر، چترال لوئر، دیر اپر، سوات اور کوہستان اپر کے ڈپٹی کمشنرز کو ہدایات جاری کی ہیں کہ وہ ہنگامی صورت حال سے نمٹنے کے لیے پیشگی اقدامات یقینی بنائیں۔

مراسلہ میں متعلقہ ضلعی انتظامیہ کو حساس علاقوں کی مقامی آبادی کو فوری طور پر الرٹ رکھنے اور ایمرجنسی سروسز، ریسکیو اہلکاروں اور امدادی ٹیموں کو تیار رہنے کی ہدایات جاری کی گئیں ہیں.

اس کے علاوہ ہنگامی سامان اور دستیاب وسائل پہلے سے موجود رکھے جائیں تاکہ کسی بھی ممکنہ واقعے سے بروقت نمٹا جا سکے۔ مراسلہ کے مطابق سیاحوں کو بھی احتیاطی تدابیر اختیار کرنے اور غیر ضروری سفر سے گریز کرنے کی ہدایت کی گئی ہے۔