پاک، امریکا تعلقات بہتری کی جانب گامزن، اسحاق ڈار، مارکو روبیو کے درمیان اہم ٹیلیفونک گفتگو

پاکستان کے نائب وزیراعظم اور وزیر خارجہ اسحاق ڈار اور امریکی وزیر خارجہ مارکو روبیو کے درمیان پیر کی رات ٹیلیفونک گفتگو ہوئی، جس میں دوطرفہ اور اہم علاقائی امور، بشمول تجارتی محصولات اور سیکیورٹی تعاون پر تبادلہ خیال کیا گیا۔

دفتر خارجہ کے مطابق یہ گفتگو واشنگٹن میں دونوں رہنماؤں کی حالیہ بالمشافہ ملاقات کے تسلسل میں ہوئی، جس کا مقصد معاشی اور اسٹریٹجک تعلقات کو فروغ دینا ہے۔ اس ٹیلیفون کال کے دوران باہمی مفادات کو آگے بڑھانے اور جاری پاک-امریکا تجارتی مذاکرات میں پیش رفت کا جائزہ لیا گیا۔

یہ بھی پڑھیں:پاک امریکا تعلقات میں اس قسم کی گرمجوشی پہلے کبھی نہیں دیکھی گئی ، خواجہ آصف

گفتگو میں تجارتی محصولات کو مرکزی حیثیت حاصل رہی، جہاں دونوں فریقین نے دوطرفہ معاشی تعاون کے فروغ میں ان کی اہمیت پر زور دیا۔ اسحاق ڈار نے امریکا کو پاکستان میں سرمایہ کاری کے پرکشش مواقع، خاص طور پر زراعت، ٹیکنالوجی اور معدنیات کے شعبوں میں اجاگر کیا۔

Deputy Prime Minister/Foreign Minister, Senator Mohammad Ishaq Dar @MIshaqDar50, spoke to the U.S. Secretary of State, Marco Rubio @SecRubio on telephone today.

Following up on their productive meeting last Friday in Washington D.C., they discussed key bilateral matters,… pic.twitter.com/HDNX275NYe

— Ministry of Foreign Affairs – Pakistan (@ForeignOfficePk) July 28, 2025

علاقائی اور عالمی امور پر بات کرتے ہوئے وزیر خارجہ اسحاق ڈار نے عالمی امن کے فروغ میں امریکی کردار کو سراہا، بالخصوص پاکستان اور بھارت کے درمیان حالیہ کشیدگی کے دوران صدر ڈونلڈ ٹرمپ کے مثبت کردار کی تعریف کی۔

دہشتگردی کے خلاف تعاون پر دونوں رہنماؤں نے مشترکہ عزم کا اظہار کیا، جبکہ وزیر خارجہ روبیو نے دہشتگردی کے خلاف پاکستان کی قربانیوں اور خطے میں امن کے فروغ میں اس کے مثبت کردار کو سراہا۔

گزشتہ ہفتے اسٹیٹ ڈیپارٹمنٹ میں ہونے والی بالمشافہ ملاقات دونوں ممالک کے درمیان سفارتی روابط میں ایک اہم سنگ میل ثابت ہوئی۔ اسحاق ڈار کے ہمراہ امریکا میں پاکستان کے سفیر رضوان سعید شیخ اور دیگر اعلیٰ حکام بھی موجود تھے، جنہوں نے امریکی ہم منصبوں سے وفود کی سطح پر بات چیت کی۔

مزید پڑھیں:پاکستان اور امریکا کے درمیان سفارتی تعلقات میں اہم پیش رفت، اسحاق ڈار اور مارکو روبیو کے درمیان ملاقات طے

اسحاق ڈار نے اسلام آباد اور واشنگٹن کے درمیان ’قریبی ہم آہنگی‘ کو اجاگر کرتے ہوئے امریکا کے ساتھ ایک ’وسیع اور مستحکم‘ شراکت داری کی خواہش کا اعادہ کیا۔ انہوں نے پاکستانی نژاد امریکی برادری کے کردار کو بھی سراہا، جو دونوں ممالک کے درمیان ایک مضبوط پُل کا کردار ادا کر رہی ہے۔

بالمشافہ اور ٹیلیفونک روابط کا تسلسل دونوں ممالک کے درمیان اسٹریٹجک، اقتصادی اور علاقائی سلامتی کے شعبوں میں تعاون کو مزید گہرا کرنے کے عزم کی عکاسی کرتا ہے۔