دریائے راوی میں انتہائی اونچے درجے کے سیلاب کا الرٹ جاری

پنجاب ڈیزاسٹر مینجمنٹ اتھارٹی (پی ڈی ایم اے) نے دریائے راوی میں اونچے سے انتہائی اونچے درجے کے سیلاب کے خدشے پر الرٹ جاری کردیا ہے۔

ترجمان پی ڈی ایم اے کے مطابق آئندہ 48 گھنٹوں کے دوران جسڑ، شاہدرہ اور ہیڈ بلوکی سے انتہائی اونچے درجے کا سیلاب گزرنے کا امکان ہے۔ اس حوالے سے کمشنر لاہور، گجرانوالہ، ملتان، ساہیوال، فیصل آباد اور متعلقہ اضلاع کے ڈپٹی کمشنرز کو الرٹ جاری کردیا گیا ہے۔

ترجمان نے بتایا کہ دریائے راوی میں پانی کی سطح میں مسلسل اضافہ ہورہا ہے۔ اس وقت جسڑ کے مقام پر اونچے درجے کا سیلاب ہے جبکہ شاہدرہ پر نچلے درجے کا سیلاب ریکارڈ کیا گیا ہے۔

پی ڈی ایم اے کے مطابق جسڑ کے مقام پر 1 لاکھ 11 ہزار کیوسک پانی مسلسل دریائے راوی میں داخل ہورہا ہے جبکہ شاہدرہ کے مقام پر پانی کا بہاؤ 46 ہزار کیوسک ہے۔

یہ بھی پڑھیں: شانگلہ میں سیلابی ریلے سے گاؤں شائی درہ مکمل تباہ،سکول بھی بہہ گیا

پی ڈی ایم اے پنجاب نے دریائے راوی سے ملحقہ اضلاع کی انتظامیہ کو ہنگامی اقدامات کرنے کی ہدایات جاری کی ہیں۔ ترجمان نے بتایا کہ دریائے راوی کے پاٹ میں موجود شہریوں کے فوری انخلاء کی ہدایات دے دی گئی ہیں اور مساجد کے اعلانات کے ذریعے عوام کو ممکنہ صورتحال سے آگاہ کیا جارہا ہے۔

ترجمان کے مطابق شہریوں کے جان و مال کے تحفظ کے لیے کسی قسم کی کوتاہی نہ برتی جائے، ہنگامی صورتحال میں عوام انتظامیہ سے تعاون کریں۔ احتیاطی تدابیر اختیار کرکے نقصان سے بچا جاسکتا ہے۔ شہری مزید معلومات اور رہنمائی کے لیے پی ڈی ایم اے کی ہیلپ لائن سے بھی رابطہ کرسکتے ہیں۔