‎صدر مملکت کی شہید میجر عدنان اسلم کے گھر آمد، اہلخانہ سے اظہار تعزیت

صدر آصف علی زرداری نے شہداء کے اہل خانہ سے اظہار تعزیت کیا اور میجر عدنان اسلم شہید اور میجر سید معیز عباس شاہ شہید کے گھروں کا دورہ کیا۔

میجر عدنان اسلم بنوں میں دہشت گردوں کے حملے میں زخمی ہونے کے بعد شہید ہوئے جبکہ میجر سید معیز عباس شاہ جنوبی وزیرستان میں انٹیلی جنس آپریشن کے دوران شہید ہوئے۔ دونوں افسران بھارتی سرپرستی میں چلنے والے فتنہ الخوارج کے خلاف بہادری سے لڑتے ہوئے جام شہادت نوش کر گئے۔

صدر مملکت نے شہداء کی جرات، قیادت اور حب الوطنی کو خراج تحسین پیش کرتے ہوئے کہا کہ شہداء کی قربانیاں اعلیٰ ترین روایات کی عکاس ہیں۔ ان کا کہنا تھا کہ پاکستان دہشت گردی کے مکمل خاتمے کے لیے پرعزم ہے۔

صدر آصف علی زرداری نے شہداء کے درجات کی بلندی اور اہل خانہ کے لیے صبر کی دعا بھی کی۔

یہ بھی پڑھیں: فتنۃ الخوارج سے جھڑپ میں شہید میجر معیز کی نماز جنازہ ادا، فیلڈمارشل کی شرکت