نئے مالی سال کے بجٹ سے قبل ہی ملک میں سولر انرجی کے شعبے میں قیمتوں میں نمایاں اضافہ دیکھنے میں آیا ہے جس کے بعد سولر پینل عام صارفین کے لیے مزید مہنگے ہو گئے ہیں۔
مارکیٹ ذرائع کے مطابق فی سولر پلیٹ کی قیمت میں 7 سے 9 ہزار روپے تک اضافہ ریکارڈ کیا گیا ہے جس سے گھریلو اور کمرشل صارفین شدید متاثر ہوئے ہیں۔
مارکیٹ میں مختلف واٹ کی سولر پلیٹس کی قیمتوں میں نمایاں اضافہ ہوا ہے۔ 585 واٹ کی پلیٹ جو پہلے تقریباً 18 ہزار روپے میں دستیاب تھی اب بڑھ کر 27 ہزار روپے تک پہنچ گئی ہے۔ اسی طرح 645 واٹ کی پلیٹ کی قیمت 22 ہزار سے بڑھ کر 31 ہزار 200 روپے ہو گئی ہے جبکہ 720 واٹ کی پلیٹ کی قیمت 25 ہزار سے بڑھ کر 33 ہزار 500 روپے تک پہنچ گئی ہے۔
تاجروں کے مطابق سولر پینلز کے ساتھ ساتھ انورٹرز کی قیمتوں میں بھی مزید اضافے کا خدشہ ظاہر کیا جا رہا ہے جس سے مجموعی طور پر سولر سسٹم لگانا پہلے سے زیادہ مہنگا ہو جائے گا۔
بجٹ سے قبل قیمتوں میں اس اچانک اضافے کی ایک بڑی وجہ آئندہ مالی سال میں سولر پینلز پر جنرل سیلز ٹیکس (جی ایس ٹی) کی شرح 10 فیصد سے بڑھا کر 18 فیصد کرنے کی تجویز ہے جس کے باعث مارکیٹ میں پہلے ہی سے غیر یقینی صورتحال پیدا ہو چکی ہے۔
دوسری جانب صارفین کا کہنا ہے کہ بجلی کے بڑھتے ہوئے بلوں کے باعث لوگ بڑی تعداد میں سولر سسٹم کی طرف رجوع کر رہے تھے تاہم قیمتوں میں مسلسل اضافے نے اس متبادل توانائی کو بھی عام آدمی کی پہنچ سے دور کر دیا ہے۔
By 
