آئندہ مالی پالیسی اقدامات کے تحت ملک میں بیوٹی انڈسٹری، جلد کی نگہداشت کے کلینکس اور ہیلتھ کلبز کے لیے خوشخبری سامنے آئی ہے جہاں درآمدی خام مال، مشینری اور دیگر سامان پر کسٹم ڈیوٹی میں کمی کی تجویز زیر غور ہے۔
ذرائع کے مطابق کسٹم کے نوٹیفکیشن نمبر 1151 اور 1152 کے تحت مختلف کیٹیگریز میں ڈیوٹی کی شرحوں میں 2 سے 5 فیصد تک کمی کی جا سکتی ہے۔ اس مجوزہ تبدیلی کا مقصد متعلقہ شعبوں میں لاگت کو کم کرنا اور کاروباری سرگرمیوں کو فروغ دینا بتایا جا رہا ہے۔
بیوٹی پارلرز میں استعمال ہونے والے میک اپ کے درآمدی خام مال پر عائد کسٹم ڈیوٹی کو 44 فیصد سے کم کر کے 40 فیصد کرنے کی تجویز ہے۔ اسی طرح بیوٹی انڈسٹری میں استعمال ہونے والے دیگر خام مال جیسے کریمز اور کاسمیٹکس، پر بھی یہی کمی متوقع ہے۔
ذرائع کا کہنا ہے کہ سن بلاک اور سن اسکرین جیسی مصنوعات پر بھی ڈیوٹی کی شرح 44 فیصد سے کم ہو کر 40 فیصد تک کی جا سکتی ہے، جبکہ بالوں کی نگہداشت سے متعلق خام مال پر بھی اسی نوعیت کی کمی کا امکان ظاہر کیا جا رہا ہے۔
مزید برآں مردانہ بیوٹی سیلونز میں استعمال ہونے والی مصنوعات جیسے شیونگ کریم، آفٹر شیو لوشن اور دیگر کریمز پر کسٹم ڈیوٹی 40 فیصد سے کم کر کے 35 فیصد کرنے کی تجویز زیر غور ہے۔
اسی طرح فیس واش، صابن اور جلد کی دیکھ بھال سے متعلق دیگر مصنوعات پر بھی ڈیوٹی 40 فیصد سے کم ہو کر 35 فیصد تک کیے جانے کا امکان ہے۔ ذرائع کے مطابق جلد کی پالش اور مختلف کاسمیٹک ٹریٹمنٹس میں استعمال ہونے والے لوشنز اور کریمز بھی اس ریلیف سے مستفید ہو سکتے ہیں۔
ہیلتھ کلبز، جم اور سلمنگ سینٹرز کے لیے درآمد کی جانے والی مشینری، آلات اور اسپیئر پارٹس پر بھی کسٹم ڈیوٹی میں کمی کی تجویز دی گئی ہے، جس کے تحت یہ شرح 40 فیصد سے کم ہو کر 35 فیصد مقرر کی جا سکتی ہے۔
اگر یہ تجاویز منظور ہو جاتی ہیں تو بیوٹی اور فٹنس انڈسٹری میں لاگت کم ہونے کے ساتھ کاروباری سرگرمیوں میں اضافہ متوقع ہے تاہم اس کے اثرات درآمدات اور ٹیکس ریونیو پر بھی پڑ سکتے ہیں۔
By 
