امریکی مداخلت قبول نہیں کریں گے ، میکسیکو

میکسیکو کی صدر کلاڈیا شین بام نے کہا ہے کہ ہم اپنے ملک میں امریکی مداخلت قبول نہیں کریں گے۔

غیرملکی میڈیا کے مطابق کلاڈیا شین بام نے امریکی صدر کے میکسیکو فوج بھیجنے سے متعلق بیان پر ردِعمل دیتے ہوئے کہا ہے کہ ’میکسیکو امریکی فوجی مداخلت قبول نہیں کرے گا‘۔

کلاڈیا شین بام نے کہا ہے کہ امریکا یہ چاہتا ہے کہ ہم منشیات مافیا کے خلاف کارروائی کریں، تو واضح کردوں منشیات فروشوں کے خلاف جو کرنا ہوگا وہ ہم خود کریں گے۔

انہوں نے کہا وہ پہلے بھی کئی بار واضح کرچکی ہیں کہ امریکا میکسیکو میں فوجی کارروائی کرے یہ نہیں ہوسکتا۔

مزید پڑھیں: امریکی صدر ڈونلڈ ٹرمپ کا نائیجیریا کو الٹی میٹم، فوجی کارروائی کی دھمکی

میکسیکو کی صدر نے کہا کہ ’ہم اس ڈرگ مافیا کے خلاف انٹیلجنس معلومات کے تبادلہ کرسکتے ہیں اور اس معاملے میں تعاون کے لیے تیار ہیں‘۔

دو ہفتے قبل امریکی میڈیا نے رپورٹ کیا تھا کہ امریکا میکسیکو میں گراؤنڈ آپریشن کی تیاری کر رہا ہے اور اس حوالے سے ٹرمپ کا کہنا تھا کہ امریکا کے پاس کارٹلز کے تمام ٹارگٹس کی فہرست موجود ہے ہمیں ہر ڈرگ لارڈ کا گھر، پتہ اور دروازہ تک معلوم ہے۔

ٹرمپ نے صورتحال کو جنگ قرار دیتے ہوئے کہا تھا کہ کارٹلز امریکیوں کو مار رہے ہیں۔

مزید پڑھیں: امریکا میں ایک کھرب ڈالر تک سرمایہ کاری بڑھائیں گے: سعودی ولی عہد کا ٹرمپ سے ملاقات میں اعلان

یاد رہے کہ امریکی صدر ڈونلڈ ٹرمپ نے میکسیکومیں ڈرگ مافیا کے خلاف امریکی فوج استعمال کرنے کا اشارہ دیا تھا۔