محکمہ موسمیات نے ملک بھر میں آئندہ 24 گھنٹوں کے لیے موسم کی صورتحال جاری کر دی ہے، جس کے مطابق بیشتر میدانی علاقوں میں موسم گرم اور خشک رہے گا جبکہ بارش کا فی الحال کوئی امکان نہیں ہے۔
صوبائی دارالحکومت لاہور میں آئندہ 24 گھنٹوں کے دوران موسم شدید گرم اور خشک رہنے کی پیشگوئی کی گئی ہے، جہاں درجہ حرارت 37 ڈگری سینٹی گریڈ تک جا سکتا ہے۔
شہر میں ہوا کی رفتار 5 کلومیٹر فی گھنٹہ اور نمی کا تناسب 64 فیصد رہے گا۔ اسی طرح وفاقی دارالحکومت اسلام آباد میں بھی موسم گرم اور خشک رہے گا، تاہم دوپہر کے بعد تیز ہوائیں چلنے کا امکان ہے۔ اسلام آباد میں دن کے وقت درجہ حرارت 33 ڈگری تک پہنچنے کی توقع ہے جبکہ نمی کا تناسب 60 فیصد ریکارڈ کیا گیا ہے۔
عروس البلاد کراچی میں گرمی کے ساتھ ساتھ حبس کی شدت بھی برقرار ہے۔ شہر میں جنوب مغربی سمت سے ہلکی ہوائیں چل رہی ہیں لیکن ہوا میں نمی کا تناسب 80 فیصد ہونے کی وجہ سے گرمی زیادہ محسوس کی جا رہی ہے۔
کراچی کا زیادہ سے زیادہ درجہ حرارت 37 ڈگری تک جانے کا امکان ہے۔ محکمہ موسمیات کے مطابق خیبر پختونخوا، کشمیر اور گلگت بلتستان میں بھی موسم مجموعی طور پر خشک رہے گا، البتہ کے پی کے کے بالائی علاقوں میں شام کے وقت بادل چھا سکتے ہیں۔
دوسری جانب ایئر کوالٹی انڈیکس کے مطابق کراچی کا فضائی معیار مضرِ صحت ریکارڈ کیا گیا ہے، جہاں ہوا میں آلودہ ذرات کی مقدار 100 پرٹیکولیٹ میٹر سے زائد ہو گئی ہے۔
ماہرین نے شہریوں کو مشورہ دیا ہے کہ وہ غیر ضروری طور پر دھوپ میں نکلنے سے گریز کریں اور پانی کا استعمال زیادہ رکھیں۔ 15 اپریل 2026 کو جاری ہونے والی اس رپورٹ نے اپریل کے وسط میں ہی موسم گرما کی بھرپور آمد کا اشارہ دے دیا ہے۔
By 
