By
ایران کے صدر مسعود پزشکیان نے یورپی اتحاد سے مطالبہ کیا ہے کہ وہ امریکا کے ساتھ جاری تنازع کے خاتمے کے لیے فعال اور تعمیری کردار ادا کرے، تاکہ خطے میں کشیدگی کم ہو اور مذاکرات کے ذریعے پائیدار حل کی راہ ہموار کی جا سکے۔
ایرانی صدر نے فرانس کے صدر ایمانوئل میکرون کے ساتھ ٹیلیفونک گفتگو کے دوران اس اہم معاملے پر تبادلہ خیال کیا۔ مسعود پزشکیان نے واضح کیا کہ ایران ہمیشہ بین الاقوامی قوانین اور اصولوں کے دائرہ کار میں رہتے ہوئے مذاکرات کا حامی رہا ہے اور اسی پالیسی پر قائم رہتے ہوئے آگے بڑھنا چاہتا ہے۔ انہوں نے زور دیا کہ کسی بھی قسم کی مبالغہ آرائی یا عالمی اصولوں سے انحراف نہ صرف اعتماد کو ٹھیس پہنچاتا ہے بلکہ کسی دیرپا معاہدے کی راہ میں بھی رکاوٹ بنتا ہے۔
یہ بھی پڑھیں :امریکہ اپنا رویہ تبدیل کرے تو معاہدے کی راہیں کھل سکتی ہیں ، ایرانی صدر
ایرانی صدر نے اپنے بیان میں کہا کہ یورپ اس حوالے سے ایک کلیدی کردار ادا کر سکتا ہے اور اسے چاہیے کہ وہ امریکا کو بین الاقوامی اصولوں کی پاسداری پر آمادہ کرے۔ ان کا کہنا تھا کہ دھمکیوں، دباؤ اور فوجی اقدامات پر مبنی حکمت عملی مسائل کے حل کے بجائے انہیں مزید پیچیدہ بناتی ہے، جس سے خطے میں عدم استحکام بڑھنے کا خدشہ پیدا ہوتا ہے۔
مسعود پزشکیان نے مزید کہا کہ امریکی پالیسی اکثر ایسے مسائل کو جنم دیتی ہے جو بعد میں خود امریکا کے لیے بھی مشکلات کا باعث بنتے ہیں۔ انہوں نے اس بات پر زور دیا کہ موجودہ حالات میں سنجیدہ اور ذمہ دارانہ سفارت کاری ہی واحد راستہ ہے جس کے ذریعے کشیدگی کو کم کیا جا سکتا ہے اور ایک متوازن و دیرپا معاہدہ ممکن بنایا جا سکتا ہے۔
