ملک کے مختلف شہروں میں دھند کا راج، موٹر ویز متعدد مقامات سے بند

ملک کے مختلف شہروں میں دھند کے باعث حد نگاہ کم ہونے پر موٹر ویز کو متعدد مقامات سے بند کر دیا گیا۔

ترجمان موٹر وے پولیس کے مطابق موٹروے ایم ون پشاور سے رشکئی، ایم 3 فیض پور سے درخانہ تک بند کر دی گئی، موٹر وے ایم 4 پنڈی بھٹیاں سے ملتان، ایم 5 ملتان سے ظاہر پیر تک جبکہ لاہور سیالکوٹ موٹر وے ایم 11 بھی دھند کی وجہ سے بند کر دی گئی۔

ترجمان موٹر وے سید عمران کے مطابق موٹروے ایم 5 ملتان سے روہڑی تک دھند کی وجہ سے بند ہے جبکہ قومی شاہراہ پر مانگا منڈی، پتوکی ، اوکاڑہ اور ساہیوال میں شدید دھند ہے اور قومی شاہراہ پر کسوال، اقبال نگر ، چیچہ وطنی اور میاں چنوں میں بھی شدید دھند ہے۔

خانیوال، ملتان، بستی ملوک ، لودھراں اور بہاولپور بھی شدید دھند کی لپیٹ میں ہیں اوراحمد پور شرقیہ، رحیم یار خان اور صادق آباد میں دھند ہے۔ ترجمان موٹر وے کے مطابق قومی شاہراہ پر حد نگاہ 0 سے 100 میٹر تک ہے ۔
تیز رفتاری نہ کریں، آگے والی گاڑی سے محفوظ فاصلہ رکھیں۔

مزید پڑھیں: سندھ، پنجاب ، خیبرپختونخوا کے مختلف حصوں میں شدیددھند، موٹر وے کے مختلف سیکشنزبند

موٹروے پولیس نے شہریوں کو خبردار کیا ہے کہ دھند میں لین کی خلاف ورزی سنگین حادثات کا باعث بن سکتی ہے، اس لیے ڈرائیورز لین ڈسپلن کی سختی سے پابندی کریں، سفر کرنے والے شہریوں کو مشورہ دیا گیا ہے کہ وہ دن کے اوقات میں سفر کو ترجیح دیں کیونکہ دھند میں محفوظ سفری اوقات صبح 10 بجے سے شام 6 بجے تک ہیں۔

ترجمان موٹروے پولیس نے ڈرائیور حضرات کیلئے ہدایات جاری کی ہیں کہ فوگ لائٹس لازمی استعمال کریں، تیز رفتاری سے گریز کریں اور آگے چلنے والی گاڑی سے مناسب فاصلہ رکھیں۔

موٹروے پولیس نے شہریوں سے غیر ضروری سفر سے اجتناب کی اپیل کی ہے اور کہا ہے کہ رہنمائی یا مدد کیلئے ہیلپ لائن 130 پر رابطہ کیا جا سکتا ہے۔