بانی پی ٹی آئی کی رات میں اسپتال منتقلی اور علاج کی خبریں! حقیقت سامنے آگئی

وفاقی وزیر اطلاعات عطا اللہ تارڑ نے بانی پی ٹی آئی عمران خان کو آنکھوں کے ماہرین کی تجویز پر ہفتے کی شب پمز لے جانے کی تصدیق کردی۔

تفصیلات کے مطابق وفاقی وزیر اطلاعات عطا اللہ تارڑ نے میڈیا سے گفتگو میں تصدیق کی کہ بانی پاکستان تحریکِ انصاف کو گزشتہ ہفتے رات آنکھوں کے ماہرین کی ہدایت پر پمز اسپتال لے جایا گیا، جہاں ان کی تحریری رضامندی سے صرف بیس منٹ تک طبی کارروائی کی گئی۔

وفاقی وزیر اطلاعات کا کہنا تھا کہ بانی پی ٹی آئی عمران خان اس دوران صحت مند اور خیریت سے تھے، اور تمام ضروری ہدایات مکمل ہونے کے بعد انہیں واپس اڈیالہ جیل منتقل کر دیا گیا۔

مزید پڑھیں: پی ٹی آئی والے اب پی ٹی ایم کا روپ دھار رہے ہیں،سابق ڈی آئی جی محمد ادریس خان

انھوں نے بتایا کہ آنکھوں کے ماہرین نےاڈیالہ جیل میں بانی پی ٹی آئی کا معائنہ کیا اور تجویز کیا کہ بانی پی ٹی آئی کو معمولی طبی کارروائی کیلئے پمز لے جانا ضروری ہے.

وزیر اطلاعات نے واضح کیا کہ تمام قیدیوں کو صحت کی سہولیات میسر ہیں اور یہ قانونی تقاضوں کے مطابق ہے۔

عطا اللہ تارڑ نے کہا کہ بانی پی ٹی آئی کی صحت بالکل ٹھیک ہے اور طبی کارروائی کے دوران بھی کوئی مسئلہ نہیں تھا۔