آئی سی سی ٹی ٹوئنٹی ورلڈ کپ 2026 میں پاکستان نے اتوار کے روز روایتی حریف بھارت قومی کرکٹ ٹیم کے خلاف میچ کے دوران بولنگ کا ایک منفرد ریکارڈ قائم کر دیا۔
یہ اہم مقابلہ آرپریماداسا اسٹیڈیم میں کھیلا گیا،جہاں سست اور اسپن کے لیے سازگار وکٹ پر پاکستان نے غیر معمولی حکمت عملی اپناتے ہوئے ایک ہی اننگز میں چھ اسپن بولرز کو استعمال کیا۔
پاکستان جو 2009 کا عالمی چیمپئن رہ چکا ہے، نے اس میچ میں محمد نواز، صائم ایوب، شاداب خان، ابرار احمد، عثمان طارق اور کپتان سلمان علی آغا کو بطور اسپنر استعمال کیا۔یہ کسی بھی ٹیم کی جانب سے ٹی ٹوئنٹی ورلڈ کپ کی ایک اننگز میں سب سے زیادہ اسپنرز استعمال کرنے کا ریکارڈ ہے، اس کے ساتھ ہی یہ کسی بھی مکمل رکن ملک کی جانب سے ٹی ٹوئنٹی انٹرنیشنل کرکٹ میں مشترکہ طور پر سب سے زیادہ اسپنرز استعمال کرنے کے برابر بھی ہے۔
پاکستان کی اسپن پر مبنی حکمت عملی کے نتیجے میں بھارت کے خلاف مجموعی طور پر 18 اوورز اسپنرز سے کروائے گئے۔ ان اسپنرز نے مجموعی طور پر 142 رنز دیے اور پانچ کھلاڑیوں کو آؤٹ کرنے میں کامیابی حاصل کی۔
صائم ایوب نے اسپن اٹیک کی قیادت کرتے ہوئے شاندار کارکردگی کا مظاہرہ کیا اور اپنے چار اوورز میں صرف 25 رنز دے کر تین اہم وکٹیں حاصل کیں جو اس میچ میں کسی بھی پاکستانی بولر کی بہترین کارکردگی رہی۔
اس کے علاوہ اسرار اسپنر عثمان طارق اور کپتان سلمان علی آغا نے ایک، ایک وکٹ حاصل کی۔ تاہم ابرار احمد اور شاداب خان کو مشکلات کا سامنا کرنا پڑا،ابرار احمد نے تین اوورز میں 38 رنز دیے، جبکہ شاداب خان نے اپنے ایک اوور میں 17 رنز د ئیے،جس سے بھارتی بیٹنگ لائن کو فائدہ پہنچا۔
پاکستان کی جانب سے اسپن دوستانہ وکٹ کا بھرپور فائدہ اٹھانے کی کوشش کے باوجود دفاعی چیمپئن بھارت نے مضبوط بیٹنگ کا مظاہرہ کرتے ہوئے مقررہ 20 اوورز میں 5 وکٹوں کے نقصان پر 175 رنز بنا لیے۔
بھارت کی اننگز کا آغاز اگرچہ مایوس کن رہا اورابھیشیک شرما پہلے ہی اوور میں بغیر کوئی رن بنائے آؤٹ ہو گئے تاہم اس کے بعد ایشان کشن نے ذمہ دارانہ اور جارحانہ بیٹنگ کرتے ہوئے ٹیم کو سنبھالا دیا۔
ایشان کشن نے 40 گیندوں پر 77 رنز کی شاندار اننگز کھیلی، جس میں 10 چوکے اور تین چھکے شامل تھے۔ بھارتی کپتان سوریہ کمار یادیو نے بھی اہم کردار ادا کرتے ہوئے 29 گیندوں پر 32 رنز بنائے، جن میں تین چوکے شامل تھے۔
اس کے علاوہ تلک ورما نے 25 رنز جبکہ شیوام دوبے نے 27 رنز کا اضافہ کیا، جس کی بدولت بھارت ایک مضبوط اور مسابقتی مجموعہ اسکور کرنے میں کامیاب رہا۔پاکستان کی جانب سے قائم کیا گیا منفرد بولنگ ریکارڈ اس میچ کی نمایاں خاص بات رہا، تاہم بھارت کی مؤثر بیٹنگ کے باعث پاکستان کو ایک بڑا ہدف ملا۔
یہ مقابلہ دونوں ٹیموں کے درمیان سخت اور سنسنی خیز مقابلے کی عکاسی کرتا ہے جس میں پاکستان نے نئی حکمت عملی کے ذریعے تاریخ رقم کی، جبکہ بھارت نے مضبوط بیٹنگ سے اپنی برتری ثابت کی۔
By 
