اسلام آباد اور گرد و نواح میں آج بجلی کی فراہمی عارضی طور پر معطل رہے گی

اسلام آباد الیکٹرک سپلائی کمپنی (آئیسکو) نے ضروری سالانہ مرمت، ترقیاتی منصوبوں اور جدید میٹرز کی تنصیب کے باعث مختلف علاقوں میں عارضی بجلی بندش کا شیڈول جاری کر دیا ہے۔ کمپنی کے مطابق کام کی تکمیل کے دوران متعدد فیڈرز سے بجلی کی فراہمی عارضی طور پر معطل رہے گی۔

ترجمان آئیسکو کے مطابق اسلام آباد، راولپنڈی، اٹک، چکوال اور جہلم سرکلز کے مختلف علاقوں میں بجلی کی سپلائی یکم جون کو مختلف اوقات میں متاثر رہے گی۔ یہ اقدام نظام کی بہتری، بجلی کی ترسیل کو مزید مؤثر بنانے اور صارفین کو بہتر خدمات فراہم کرنے کے مقصد سے کیا جا رہا ہے۔

آئیسکو کے جاری کردہ شیڈول کے مطابق جی ایس او سرکل کے بعض علاقوں میں صبح 6 بجے سے دوپہر 3 بجے تک بجلی بند رہے گی، جبکہ آزاد پتن اور اس کے گردونواح میں صبح 8 بجے سے شام 4 بجے تک بجلی کی فراہمی معطل رہے گی۔

 یہ بھی پڑھیں :پانچ گھنٹے مختلف علاقوں میں بجلی بند رہے گی، آئیسکو نے شیڈول جاری کر دیا

اسی طرح 132 کے وی نئی واہ گرڈ اسٹیشن سے منسلک علاقوں میں صبح 8 بجے سے شام 6 بجے تک بجلی بندش متوقع ہے۔ چکوال، تلہ گنگ، بگوال، کہوٹہ سٹی، پالندری، نیو واہ، باہتر موڑ اور ملحقہ علاقوں میں بھی مختلف اوقات کے دوران بجلی کی فراہمی متاثر ہو سکتی ہے۔

ترجمان کا کہنا ہے کہ مرمتی اور ترقیاتی کاموں کی بروقت تکمیل کے لیے یہ بندش ناگزیر ہے۔ انہوں نے صارفین سے تعاون کی اپیل کرتے ہوئے کہا کہ اگر تمام کام مقررہ وقت سے پہلے مکمل ہو گئے تو متاثرہ علاقوں میں بجلی کی فراہمی شیڈول سے قبل بھی بحال کر دی جائے گی۔

آئیسکو انتظامیہ نے بجلی بندش سے ہونے والی ممکنہ پریشانی پر صارفین سے معذرت کرتے ہوئے یقین دہانی کرائی ہے کہ نظام کی بہتری اور بجلی کی فراہمی کو مزید مستحکم بنانے کے لیے یہ اقدامات کیے جا رہے ہیں۔