دورہ ایران، وزیراعظم شہباز شریف سابق سپریم لیڈر علی خامنہ ای شہید کے جنازے میں شرکت کیلئے روانہ

وزیراعظم شہباز شریف آج ایران و ترکیہ کے پانچ روزہ سرکاری دورے پر روانہ ہوگئے ہیں جہاں پہلے مرحلے میں وزیراعظم ایران جائیں گے، جہاں وہ آیت اللہ علی خامنہ ای کی نمازِ جنازہ اور آخری رسومات میں شرکت کریں گے۔

تفصیلات کے مطابق وزیرِاعظم شہباز شریف شہید ایرانی سپریم لیڈر آیت اللّٰہ سید علی خامنہ ای کے جنازے میں شرکت کریں گے ، ان کے ہمراہ اسپیکر ایاز صادق، اسحاق ڈار، عطاء اللّٰہ تارڑ، بلاول بھٹو زرداری ، نیرحسین بخاری اور وزیرِ اعلی سندھ مراد علی شاہ بھی ہیں۔

یہ بھی پڑھیں :وزیراعظم کا دورہ ترکیہ و ایران : کل سابق سپریم لیڈر خامنہ ای کی تعزیتی تقریب میں شرکت کرینگے، ترجمان دفتر خارجہ

اپنے دورے کے دوران وزیرِ اعظم شہباز شریف عوام اور حکومت کی جانب سے ایرانی قیادت اور سوگوار خاندانوں سے دلی تعزیت کا اظہار کریں گے ، وزیراعظم برادر ایرانی قوم کے ساتھ پاکستان کی مکمل یکجہتی کا اعادہ بھی کریں گے۔

🚨وزیراعظم شہباز شریف ایران کے سپریم لیڈر آیت اللہ علی خامنہ ای کی نمازِ جنازہ میں شرکت کے لئے تہران روانہ۔۔۔@CMShehbaz @khamenei_ir pic.twitter.com/ieoriLEVkq

— Azaad Urdu (@azaad_urdu) July 3, 2026

دوسری جانب، چیئرمین سینیٹ یوسف رضا گیلانی کی سربراہی میں پاکستانی وفد پہلے ہی تہران پہنچ چکا ہے ، وفد میں گورنر خیبر پختونخوا فیصل کریم کنڈی، جماعت اسلامی کے رہنما لیاقت بلوچ اور مختلف مذہبی و سیاسی جماعتوں کے نمائندے شامل ہیں ۔ اس کے ساتھ ساتھ وزیر داخلہ محسن نقوی بھی تہران پہنچ چکے ہیں، جہاں ایرانی وزیر داخلہ اسکندر مومنی نے ان کا استقبال کیا۔

ایرانی حکام کے مطابق آیت اللہ علی خامنہ ای کی سات روزہ آخری رسومات کا آغاز ہو چکا ہے، جن میں دنیا بھر سے 100 سے زائد ممالک کے نمائندوں کی شرکت کا امکان ہے ، تعزیتی  تقریبات کا اختتام 9 جولائی کو مشہد میں تدفین کے ساتھ ہوگا۔

یہ بھی پڑھیں :ایران کے شہید سابق رہبرِ اعلیٰ خامنہ ای کی تجہیز وتدفین کی 7 روزہ رسومات، کب ، کہاں کیا ہو گا؟

بعد ازاں وزیرِ اعظم شہباز شریف دورہ ٔ ترکیہ کے لیے تہران سے استنبول روانہ ہوں گے۔