جدید ٹیکنالوجی کا مظاہرہ حادثے میں بدل گیا،پولیس موبائل سے جا ٹکرائی

اسلام آباد میں ریموٹ کنٹرول سے چلنے والی بغیر ڈرائیور گاڑی کا عملی مظاہرہ اس وقت حادثے کا شکار ہوگیا جب گاڑی پارلیمنٹ ہاؤس کے باہر کھڑی پولیس موبائل سے جا ٹکرائی۔

میڈیا رپورٹس کے مطابق ایک ڈیجیٹل کانٹینٹ کریئیٹر جدید ڈرائیور لیس ٹیکنالوجی کا مظاہرہ کرنے کیلئے گاڑی کو دور بیٹھ کر کنٹرول کر رہا تھا۔ تاہم انٹرنیٹ کنکشن میں اچانک خلل کے باعث گاڑی بے قابو ہوگئی اور پولیس کی گاڑی سے جا ٹکرائی۔ خوش قسمتی سے حادثہ ایسے وقت میں پیش آیا جب علاقے میں ٹریفک نسبتاً کم تھی، جس کے باعث کوئی بڑا جانی نقصان نہیں ہوا۔

یہ بھی پڑھیں:سونے اور پلاٹینم سے بھرا سیارچہ، زمین پر ہر شخص کھرب پتی

واقعے نے ڈرائیور لیس ٹیکنالوجی کے ممکنہ فوائد کے ساتھ ساتھ اس کے استعمال میں درپیش تکنیکی چیلنجز کو بھی اجاگر کردیا۔ ماہرین کے مطابق ریموٹ یا خودکار گاڑیوں کیلئے مستحکم کنکشن اور مؤثر حفاظتی نظام انتہائی اہم ہیں۔

واضح رہے کہ واقعے سے متعلق دستیاب معلومات ابتدائی رپورٹس پر مبنی ہیں، جبکہ حادثے کی مکمل وجوہات اور ذمہ داری کا تعین متعلقہ حکام کی تحقیقات کے بعد ہی ہوسکے گا۔