پاکستان سپر لیگ (پی ایس ایل) کے 12ویں ایڈیشن کی تاریخوں کا اعلان کردیا گیا ہے۔ اعلامیے کے مطابق ٹورنامنٹ 18 مارچ سے 2 مئی تک جاری رہے گا، جبکہ اس بار لیگ کے میچز ملک کے 5 سے 6 شہروں میں کرانے کا منصوبہ بنایا گیا ہے۔
پی ایس ایل کی گورننگ کونسل کے اجلاس میں فیصلہ کیا گیا کہ کھلاڑیوں کی نیلامی 23 جنوری کو ہوگی، جس کے ذریعے طے کیا جائے گا کہ کون سا کھلاڑی کس ٹیم کی نمائندگی کرے گا۔
اجلاس میں یہ بھی طے پایا کہ کھلاڑیوں کی براہ راست سائننگ کا عمل آج سے 23 نومبر تک جاری رہے گا۔ تاہم، براہ راست سائننگ کے لیے شرط رکھی گئی ہے کہ متعلقہ کھلاڑی نے پی ایس ایل کے گزشتہ 2سیزنز میں شرکت نہ کی ہو۔
چیئرمین پاکستان کرکٹ بورڈ محسن نقوی نے کہا کہ پی ایس ایل کے 11ویں ایڈیشن کا اختتام ریکارڈ تعداد میں شائقین کی موجودگی میں ہوا، جو لیگ کی مقبولیت کا ثبوت ہے۔
ان کا کہنا تھا کہ اس مرتبہ پی ایس ایل کو مزید شہروں تک لے جانے کا ارادہ ہے، کیونکہ یہ پاکستان میں کرکٹ کا سب سے بڑا اسٹیج ہے۔
نئے ایڈیشن میں میچز کی تعداد، شہروں کے انتخاب اور ٹیموں کی حتمی تفصیلات سے متعلق مزید معلومات سامنے آنے پر شائقین کو ٹورنامنٹ کے شیڈول اور انتظامات کے بارے میں آگاہ کیا جائے گا۔
By 
